المساعد الشخصي الرقمي

مشاهدة النسخة كاملة : قصائد ابن نصار



عطر الكفيل
15-01-2011, 09:42 AM
بسم الله الرحمن الرحيم



اللهم صل على محمد وآل محمد




السلام عليكم ورحمة الله وبركاته



ابن نصار وقصيده نصاريات

من اعلام الصادقين هو العالم والمجاهد والشاعر الموفق والخطيب اللسن الشيخ محمد الشيباني المشهور بابن نصار النجفي واشتهر باللملومي ايضاً لملوم هي قرية على شاطئ الفرات قريبة من مدينة الشنافية اندرست بسبب الخنياب والفيضان ويغرق شط الفرات جانباه فانتشر اهل القرية في مدن متفرقة، الشيخ محمد بن نصار لم نعرف بدقة تاريخ ولادته غير انه نشأ في اسرة علمية وعاش اغلب ايامه في النجف الاشرف حتى يذكر انه صدم رحمه الله حينما فقد اكثر من اربعين نفراً من اسرته دفعة واحدة في مرض الطاعون الذي فتك بالمنطقة عام 1247هجرية، الشيخ محمد نصار شاعر مجد باللغتين الفصحى والدارجة وسبحان الله منذ وعيت انا وعرفت نفسي في العراق في الخليج اذا ما كان الخطيب ومهما كان علمه وصوته اذا ماكان يحفظ شعر بن نصار مايستمزج منبره لان شعره موفق، موفق لانه ناظمه بنية سليمة، نحن نسأل الله ان يجعل اعمالنا لوجه الله واكثر ما يلفت النظر هو موفقية شعره، له ديوان في الشعر الدارج الشعبي يعرف بالنصاريات حينما يقرأ على المنابر يشعر المستمع بانه شعر نظم على التو لتأثيره في النفوس وهذا من اعظم رموز موفقيته، هذا العالم والشاعر له قصائد في القريض ايضاً رثا بها اهل البيت وبالخصوص ابا الاحرار سيد الشهداء ابو عبد الله الحسين صلوات الله وسلامه عليه ويعجب الانسان حينما يسمع له قصيدة لا تملها النفوس رغم انه يمر اكثر من قرن على نظمها فما من بلد وما من خطيب الا ويذكر قصيدته يوم العاشر من المحرم بل اكثر من هذا، طالما احسست بان الجموع في يوم العاشر من المحرم اذا لم يذكر الخطيب هذه القصيدة تشعر بفراغ ولذلك يفصل في القصيدة









زينب تخاطب الحسين عند مصرعه




فك احسين عينه و الدمع خر
ليل و فوگ جرحه يجلب احمر



ناداها ابضعيف الصوت يا ختي
مهو حچيچ شعب گلبي تسكتي
ينور العين خليني ابمهجتي
اعالجها ترى گلبي تمرمر



بچت عنده او صاحت له يعگلي
يروحي او نور وجهي او باقي اهلي
يخويه احسين شته يس دگلي
يخويه يا صواب اليوجع اكثر



يگلها اصواب البوجهي يضدني
و لبراسي حمس چبدي اوفتني
و لبضلعي بهض حيلي او ضهدني
و لبگلبي يخويه يوجع اكثر



يخويه يابس امن العطش چبدي
يخويه و التراب احرگت زندي
يخويه و الشمس احرگت خدي
دفيیلي ابردن ثوبچ من الحر



يخويه ما احب سكنه تجيني
تشوف اجروحي او تسمع ونيني
مالي قلب اشوفنها ابعيني
ذليله ما لها والي الينغر



يخويه لا تليعي القلب بالله
و بني عفلي هاله هالله الله
يخويه بعد عيني الكم الله
او ذكريني او كل امصاب يزغر



يحاچيها او تصب عينه ادموعه
لن قلبه انخفى و احنت اضلوعه
غمض عينه او صارت بيه موعه
هوت يمه او دمعها اعليه ينثر



تشم احسين و تچلب ابجرحه
او لن الشمر يدفعها ابرمحه
گومي يو أذبحچ فوگ ذبحه
و خليها ابعمر الدهر تذكر

عطر الكفيل
15-01-2011, 09:45 AM
زينب تخاطب الشمر

بالله ياشمر عنه دوخر
ادبحني و خل اخوي احسين واسدر


تگله يا شمر بالله دخليه
او ما شافه من الطبراتييزيه
تشوفه ايلوج ما غير النفس بيه
او عينه نوب يشبحها اوتغمر


دگلي يا كتر خالي امن الجروح
تحط سيفك يخايب و الدما يفوح
طبره فوق طبره تشعب الروح
يشوغ الگلب من عدها اويفغر


يخايب خل اخوي احسين ساعه
اغمضنه و مد للموت باعه
مهو شمامتي الحلوة اطباعه
دخلي ابراح روح احسين تظهر


يخويه بيش اضمك وين اوديك
يخويه اشلون اصد عنك وخليك
تراني اتحيرت يا مهجتي بيك
يخويه بيش أظلل لك من الحر

هوت يمه تشم كسر البضلعه
اخوي المطبع يشبه الطبعه
غابت روحه فزت اتودعه
او لن راسه بلملوث ينور

عطر الكفيل
15-01-2011, 09:48 AM
في رثاء الأنصار


الكون أظلم ابعج الخيل واغبر
و شع ابلمعة الأنصار و ازهر



احتوف هايجه أو ماتعرف الذل
اشلون اللي بعرينه اوهاج مقبل
تلوى دون عزها لويةالصل
ابزاغوره او نفج علموت لحمر


كل لماع مدرع يشع للناس
وجهه و الدرع و السيف والطاس
متبسم امشرعب ناشر الراس
كفو بالموت دون احسين مستر


اششم حران من رمحه ايتطاير
تقول الموت من سيفهايتقاطر
ما و الله اتقرب ليه وتجاسر
عقوبتها او ظل بالكون يذكر


احلولك من لفت ذيش المشاهير
احلول الموت و احلولالمغاوير
أظلم الكون بس لفعالغدادير
تشع أووجهاالكون تزهر


لو صاح الحريب و رجوا الزان
ما و الله ضل بالكونحران
تغدي اقرومها شي شفت غزلان
ابمرتعها اسباع الزور تفتر


قضو حق العليهم دون الخيام
او لا خلوا خوات احسينتنضام
لما طاحوا تفايض منهمالهام
تهاووا مثل مهوى النجم من خر

على الأنصار با قلبي تفطر
تهاووا مثل مهوى النجم من خر




هذا الرمح بفاده تثنه

او هذا بيه للنشاب رنه

او هذا الخيل صدره رضرضنه
او هذا او ذاك بالهندي موذر


هووا ما بين من قطعوا وريده
وقع راسه او بين الطارت ايده
او بين امشبح ابرميه شديده
او بين الصار للنشاب مكور


او ويلي الروس شالوها على الزان
او لعبت خيلهم علجثث ميدان
نجوم اتموج من دمها ابغدران
نوب تطفح او نوب اتغور


ركب غوجه او تعنا احسين ليها
لقاها بس جثث و امسلبيها
صب الدمع و اتلهف عليها
او قال احتسب عند الله واصبر


و يا احسين ما ضل بلمخيم
غير اولاد اخوه واولاد مسلم
و اولاده واخوته و اولاد العم
او غير اولاد عبد الله ابن جعفر


اويلي من الأنصار الخيم تصفر
بس اولاد هاشم نجم تزهر



الكل شبان ما منها لبخده
اختط الشعر لا و الله اوجده
او بين ادرك ابلوغ او بين بعده
او بين البلمهد يلعو ويفغر


يويلي من تلاقواعند لوداع
دروا ما بعد ملقى غيرهساع
غدى ماي الدمع ينشال بالصاع
اوتقلي اقلوبها امن العطش و الحر


هذا يشبك ابهذا ويحبه
او هذا ابقلب هذا يحطقلبه
او هذا دمعه الهذا يصبه
او هذايشم خد هذا او يصفر


اويلي غدت للشبان حنه
غدى هذا الهذا يجر ونه
و كل واحد لعد موته تمنه
و لا يبقى الهذا اليوم لقشر



سبق للحرب عبد الله ابن مسلم
امنتب من ابوه النفل و الام
شباب ابن احدعش مزراق من سم
تلوه او نفج يقطر موت احمر


ابن مسلم لعند الحر بشمر
شباب او لا يخاف الموت مشهر



اسم الله اعليه فرع بالذوايب
قمر لاشن ابليل الشعرغايب
حاط الخيل وادماها جنايب
او خلاها امروج اتموج بالبر


يشع بسام و الميدان مسود
او رجف زانته و الموت يرعد
تنخه او قال ولكم شي الهلحد
اراويكم اليوم الموت لحمر


ابن هاشم و شبل الليث معلوم
جربت و الزمط ينعرف هاليوم
طفحها او ذبها على الصمصوم
او رد النبع بالهندي مكسر


حر يخطف الزانات و اتذيه
او من ينصب الكفه الموت يلويه
يجر سيفه و المقدر يشع بيه
او خاف الموت من عنده اوكشر


اجاه السهم بس تسمع رعيده
امنيشن قصته ابرميه شديده
شقف عن الوجه ويلاه بيده
سمرها القصته او خلاهيفغر


يا قلبي لبن مسلم تفطر
شباب او مثل روح الطير منخر





بعدهم طلع طفل امن الصواوين
امطوق و التراشى على الخدين
يدير العين يسره او نوب ايمين
طفل مدهوش يتلفت امدعر


ابشبده من لهيب العطش بورح
تراشيه على خده تطوطح
عليه السهم يا ويلي تلولح
و بوريده و قع لا جدم اووخر


ظلت شهربانه بس تولول
على التربان يا ويليلي لمدلل
طوقه ابفيض او وريده امبلل
فوق الرمل تحت الشمس والحر


غدوا وسفه بني هاشم مطاعين
جميع او موحشه منها الصواوين
و لا ناصر بقى منهم و يا لحسين
بس عباس و الجاسم ولكبر


ابو فاضل تلولح فوقلشقر
ليث هاج من شيبه امعبر

عطر الكفيل
15-01-2011, 09:50 AM
خروج أبا الفضل العباس


شجاعة أبا الفضل العباس
قصيدة الشجاعة
===
ابو فاضل تلولح فوق لشقر
ليث هاج من شيبه امعبر



نزل عباس يتمرضغ بلحسين
يحب ايده و جدم رجليه والعين
تسايل بالمدامع على الخدين
لما حن و بشى احسين اوتحسر


صاح احسين ياخويه يعباس
ينور العين يا تاجي علىالراس
يخوي انت الدرع و السيف و الطاس
اشلون اتروح و اناابقى امحير


يخوي احسين يا زهرة زماني
يخوي نحلت سكنهاعظامي
دخليني اريد الحق اعمامي
اريد الثار قلبي دميفور


يقله اوداعة الله ياعيوني
نيتكم او حيدي تخلوني
ركب و ارزم و قلهم تعرفوني
طليعة حيدر الليث المشكر


تشعشع بالحرب عنده الحرب عيد
شن ابصاقعه او طاحت منارعيد
يحسب السيف مبسم و النبل غيد
تتماوع و عج الخيل عنبر


عروس الحرب و العباس عريس
ايتبختر بين زفافه ملابيس
نكس و رعب اقلوب المداليس
او طفحها كفو نعمين واكثر


شمر فوقها و خلى المداريع
ما تعرف رسنها امنالمصاريع
تهاوت و اخلست بين المشاليع
تخف ارواحها امن الموتلحمر


قلب يمنى الحرب من فوق يسراه
او يسرى الحرب من فوقيمناه
لوى الجنحين من فوق القلب و الواه
عليهن و العزيزالروح من فر


حرب عباس من صحه او يعرفه
بيده السيف و البيرق ابشفه
او بيده الصرع و القربه ابشتفه
مترهي ايتلولح على العسكر


يحاشي النفس يا نفسي تهونين
كل الناس تغدي فدوه لحسين
الف واسفه يخوي ما لك امعين
تظل بعدي يبو سكنه امحير


ابو فاضل و لى الشاطي اوحدر
شبده من لهيب العطش فطر





ابو فاضل و لى الشاطي اوحدر
شبده من لهيب العطش فطر

خاض الماي بس هيس اببرده
ترس شفه يروي عطششبده
تذكر لن اخوه احسين بعده
دب الماي من شفه وتحسر


هذا الماي يجري بطون حيات
و ضوقه قبل شبد احسينهيهات
اظن طفله يويلي امن العطش مات
و اظن موتي قرب و العمرقصر


اشلون اشرب و اخوي احسين عطشان
وسكنه والحرم و اطفالرضعان
و اظن قلب العليل التهب نيران
يريت الماي بعده لا حلا او مر


همته بس يوصل الماي لحسين
لا قامن و لا قعدن الكفين
همه اطفال موتى بالصواوين
عطاشا اقلوبهم تلهب منالحر


طاح ايمين ابو فاضل وليسر
خطف جوده ابحلقه و للخيم فر





طاح ايمين ابو فاضل وليسر
خطف جوده ابحلقه و للخيم فر






اجاه السهم للقربة و فراها
وقف يبشي و سكنه مانساها
امواعدها على اميه الحشاها
و منها يستحي للخيم يصدر


سمع لحسين حسه وركب و ارزم
فار اعلى الخيل طلعها امن المخيم
رد يمه او شافه سابح ابدم
تخوصر فوق راسه و الدم عخر


حط راسه ابحضنه ابقلب مرتاع
شاله و تربه عباسبالقاع
رد احسين راسه ابقلب مرتاع
شاله اردود للتربان والحر


يخوي العلم قلي وين اوديه
ينور العيندربي بيشاجديه
حنا فوقه او شمه واشبك ايديه
اوصاح احسين يخوي الله اكبر


يخوي انكسر ظهري و ما اقدر آقوم
صرت مركز يخوي الكل لهموم
يخوي استوحوني عقبك القوم
او لا واحد عليه بعد ينغر


يخوي امنين إجتني هالرزيه
يخوي اساع وقع بيتي عليه
يخوي اسا عدوي شمت بيه
و شوفك يبو فاضل امطبر


راد احسين شيله للصواوين
انتبه عباس لحسين او زرقعين
يقل اشرادتك ياخوي يحسين
يقله اريد شيلنك وسدر


يخوي احسين خلني ابمشاني(ابمكاني)
يقله ليش يا زهرة زماني
يقله واعدت سكنه تراني
ابماي واستحي منها امن اسدر


يخوي اشلون اشوفنها ابياعين
لو جتلي و قالت لي الوعد وين
دخلني اموت اهناه ياحسين
يخوي المستحا من شيمة الحر


قام احسين يبشي للصواوين
ينشف دمعته عن النساوين
خاف لنهن ينفقدن على احسين
او يقلن له عليمن هالدم عخر


او ويلي تلقته تبشي اسكينه
تقل له عمي العباسوينه
شرب ماي او نسانا ما نسينه
العطش و اقلوبنا تلهب من الحر


خرت دمعة احسين او تنحب
او قال لها و نار القلب تلهب
ابشاطي العلقمي عمش امترب
قضى فرت اتصيح الله اكبر


شل اطرادها ابن احسين لكبر
او خلى الخيل بالهام اتتعثر

عطر الكفيل
15-01-2011, 09:54 AM
خروج علي الأكبر للحملة الأولى
رجوع علي الأكبر وطلب الماء
====
شل اطرادها ابن احسين لكبر
او خلى الخيل بالهام اتتعثر


امصيت هلهلت له الخيل لو لاح
عليها و اصفقت له اطرافلرماح
و ارقصت له السيوف ابروس لفراح
او فوق الطوس دقت ضربلقشر


من هاشم امنتب موش ملفوف
ابوه احسين بالميدانموصوف
او جده حيدر الكرار معروف
او عمه الحسن و العباس الأزهر


اهتز ابغيرة الله و فرع الراس
تبارق بالوجه و الدرع والطاس
او سيفه الشعشعاني المرهب الناس
او بالخيل الطلايع ضيق البر


اششم حران من غدراته نس
مهو ابن احسين ضرب السيف لو بس
ابرمحه شم عجيد اصياح لبس
او خلاها ابجماجمها اتتعثر


تموج الخيل من يجبل عليها
شن الخيل عزرائيل بيها
ذب هدا ورا هذا لديها
مساميها او رمحه يلحق الفر


شباب و لا يهاب الموت طفاح
بسرج عالي طويل الظهرنفاح
ارضى السيف واتطاشرت لرماح
او رد ايلوج بلسانه اويفغر

عطر الكفيل
15-01-2011, 09:55 AM
علي الاكبر يطلب الماء
طلب الماء من الحسين
=====
مض العطش بابن احسين لكبر
او رد ايلوج بلسانه اويفغر


يصيح ابصوت فت قلبي او شعبني
يبوي قوم ليه العطش ضرني
يبويه درعي او طاسي بهضني
يبويه او نشفت ارياقي من الحر


يبويه شربت اميه لشبدي (لكبدي)
اتقوى و رد للميدان وحدي
يبويه انفطر قلبي او حق جدي
العطش و الشمس و الميدان و الحر


يقلله امنين اجيب الماي يابني
مهو حشيك(حكيك) بهض حيلي وشعبني
او فت روحي او حمس شبدي (كبدي) او صلني
يبويه استخلف الله العمر و اصبر

يقله و الدمع يجري من العين
يبعدي و بعد كل الناس ياحسين
تقل لي اصبر و قلبي صار نصين
اشلون اصبر يبويه والصبر مر


حن احسين اويلي و سال دمعه
حنا ظهره على ابنيه او كسر ضلعه
دار ايده على اطواقه يودعه
يشمه و العيون اتسيل محمر

عطر الكفيل
15-01-2011, 09:58 AM
وداع الاكبر للحسين ولزينب عليهم السلام

====
تسايل يا دمع لوداعلكبر

يقلبي ذوب لوداعه وتفطر

يويلي من تلاقوا عند لوداع
امشابق طول لمن هووا للقاع
لاع ابن لبيه و الأبو لاع
على ابنيه يويلي اوداع لقشر

يشم احسين خد ابنه و يحبه
او دمع مثل دمع ابنه يصبه
و النار البلقلب ابنه ابقلبه
يخفيها على ابنه او نوبت ظهر

يقله و الدمع بالعين دفاق
ابعبره امكسره و ابقلب خفاق
يبويه او داعة الله هذا الفراق
يبويه اشبيدنا هذا المقدر

يبويه للسيوف اسدر او للزان
او لوح ابغاربه او شلش الميدان
يبويه اليوم مرواحك للجنان
و بالكوثر يبويه اليوم تفطر




تحسر ويل قلبي و جذب ونه
و من الماي آه انقطع ظنه
عرف لن المنيه دنت منه
خر دمعه و للميدان سدر



شبل احسين للميدان سدر
و خلى الخيل بالهامات تعثر


سدر و الكون شابش زان و اسيوف
نشاب و نبل و اسهام واحتوف
ما و الله رجف قلبه من الخوف
و لا وجهه من اشراقه تغير


رد اسيوفها و النبل و الزان
خطيبه و القروم او جوهنسوان
سبل طاوي او نفج من شيب غيلان
و شاف الغنم بالمرانتجتر


هز غدارته و ذب العمامه
نشر راسه اسم الله اعلى النشامه
خز اقلوبها او شرق الهامه
و لف راياتها و السر بنشر


ربط زانته و الموت بيها
او صاح ارقابها او حوم عليها
يا مبعد اهاليها عليها
وين اتفر و طير الموت يبحر


عقب ما شرق الهامات و الطاس
اجته ضربة العبدي على الراس
ذبل و اتواردوا بسيوفها الناس
شبق عالمهر ويلي و المهر فر



على ابن احسين يا قلبي تفطر
شبق عالمهر ويلي و المهر فر


شبك علمهر لباله يوديه
لبوه احسين عن القوم يحميه
او ويلي المهر للعدوان فريه
او اوشب آه بموسط العسكر


داروا بالسيوف اعليه و الزان
مثل شتال (قتال) سبع المات فرحان
عسى ابعيد البلى وليته العدوان
ارذال او بالمعايب دوم تفخر


هذا ايقطع ابسيفه وريده
و هذا بالخناجر قطع ايده
او هذا ايغط من رمحه الحديده
ابخاصرته، وهو يعالج ويفغر


ثقل بيه الطبر و تلوج روحه
او محد عرف غير اللهاجروحه
دمايانه على احصانه سفوحه
لما خر ابهناديها اموذر


نده ياحسين هذا الساع جدي
سقاني الماي و اروى عطش شبدي (كبدي)
يقول اسرع تراك اليوم عندي
اجاه ايصيح يا ابني الله واكبر



أو ويلي احسين صاح الله اكبر
يبويه ليش هالنومه بهالحر


قعد عنده و شافه امغمض العين
ابدمه سابح امترب الخدين
متواصل طبر و الراس نصين
حنا ظهره على ابنيه اوتحسر


يبويه قول منهو الشرق راسك
ينور العين من خمد انفاسك
د قللي من نهب درعك و طاسك
يروحي اشلون اشوفك امطبر


يبويه من عدل راسك و رجليك
او من غمض اعيونك و اسبل ايديك
ينور العين كم سيف وصل ليك
قطع قلبي و لعند احشاي سدر


يبويه من سمع يمك ونينك
او من شبحت لعند الموت عينك
للعشرين ما وصلن اسنينك
او حاتفني عليك الدهر لقشر


اريد امسح اجروحك و شم خدك
و حط صدري على صدرك ووسدك
يبويه شوف لاشن (لكن) حرم جدك
او جت زينب تصيح الله اكبر





او جت زينب تصيح الله اكبر
يعمه ليش هالنومه ابهالحر


هوت فوقه تشم خده و تحبه
او تطبق طبرت الراس اوتعصبه
او تسفر ضيق ثوبه تجس قلبه
لقت دمه من افاده يفور


يويلي و لولت واحنت ظهرها
تخمش اخدودها او تحلج شعرها
و تدق براسها او تلطم صدرها
و تنعي ابصوت ايطر قلب الصخر طر


يشمس القيض ياليلهب وجها
يبدر التم يا مطفي سرجها
يسم الخيل يلمشتر مرجها
اشلون امن السرج تنشلع واتخر


ينجم اسهيل يالحامي الشرايع
يا جرناس يامعذب البراجع
يشبل الموت يمسدر القلايع
اشلون امسيت للنشاب مكور


ردها احسين للصيوان بالهم
او شاف الخيل دارت عالمخيم
او لن ابن الحسن جسام مرزم
يصيح ابصوت عالي الله اكبر

عطر الكفيل
15-01-2011, 10:04 AM
استئذان القاسم من عمه
وداع القاسم للحسين
====
طلع جسام يصيح الله أكبر
درخصني يعمي ما اقدر اصبر


بس شافه شبق فوقه و تباشوا (تباكوا)
اختنقوا بالبواشي (بالبواكي) و ماتحاشوا(تحاكوا)
لمن غابت الروح و تتاشوا
على التربان ويلي و الوقت حر


لما ابدت الروح ابعمه و بيه
طلب جسام رخصه او ماايخليه
وقع ويلي يحب ايده و رجليه
درخصني يعمي ما اقدراصبر


يقله ابقى لبن عمك تباريه
عليل او ما بقى غير النفسبيه
يعمي اخلافنا يمشن تسليه
و ظن هيهات يتسلى اويستر


تقلي اسدر يعمي للصياوين
امن اقلك راد ليها شذبياحسين
ارد عنك دعلمني ابيا عين
اشوفنك على الرمضى امطبر


يقلله ياقمر بيتي يشعاع
يعمي او داعة الله هذاالوداع
ركب او رزم و ذبها موش مرتاع
شهاب او يحرج الطاغي منيخر



عرض للحرب جسام و اشهر
شهاب او يحرج الطاغي منيخر


جر السيف و الزانه نكثها
او طفح على الملزومه اوفرثها
جثث بالروس و الروس ابجثثها
اسم الله اعليه خلاها تعثر


تبردق فوق مهره او قال يومي
او قال الزانته عل خيل حومي
رفها او قال للرايات قومي
عن دربي او صيري اتياهب البر


يخز عين الطليع او قال ثجل
ابظلمه او للذهب واجمشبل
من يلمع شعاع السيف يثول
حمام او من يشوف الطيريصجر


من يدني او عزرائيل بيده
غيث و ابصواعجه ارعيده
قانوص او تلولح على الصيدة
ابظهر اشقر شمر قوشها مسفسر


انقص اشراك نعله او قام يلويه
او لزدي بوق اجا والسيف يخفيه
ضرب راسه و جاسم ما درى بيه
خر او صاح يا عمي لمشكر

عطر الكفيل
15-01-2011, 10:06 AM
مجيئ الحسين عند مصرع القاسم
=====
على ابن الحسن يا قلبي اتفطر
خر او صاح يا عمي لمشكر



بس ما سمع حسه شرعبت بيه
شتل(قتل قتال ) شتال جسام او سدر ليه
لقاه ايعالج او يبحث ابرجليه
يلوج ابروحه او دمه ايفور



بشا (بكى) و ناداه يا جاسم اشبيدي
يريت السيف قبلك حز وريدي
هان الكم تخلوني وحيدي
على اخيمي يعمي الخيل تفتر



يعمي اشقالت امن الطبر روحك
يجاسم ما اتراويني اجروحك
لو ان ابقى يعمي شنت انوحك
ابقلب مثل الغضا و ابدمع محمر



حط احسين صدره ابصدر جسام
شبق فوقه او شاله يمالخيام
صدره ابصدر عمه او خط بالاجدام
بالتربان و احسين ايتعثر



جابه او مدده ما بين اخوته
بشى (بكى) عدهم يويلي و هم موتى
بس ما سمعن النسوان صوته
اجت سكنه تصيح الله اكبر

عطر الكفيل
15-01-2011, 10:10 AM
سكينة ترثي القاسم

اجت سكنه تصيح الله اكبر
يجاسم ليش هالنومه بهالحر


عسى ابعيد البلا خدك على القاع
يجاسم موش وكت الموت هالساع
جاسم يبن عمي لو ان تنباع
ابماي العين شنت (كنت) اشريك ياحر

عسا هي ابرقبتك كل الخطيه
تخليني غريبه واجنبيه
يجاسم عرس اقشر عليه
عريس و يزفونك امطبر


امبارك بين سبعين الف جابوك
ابدال الشمع بالنشاب زفوك
عن الحنه ابدم الراس حنوك
على راسك املبس نبل ينثر


يجاسم ليت هالطبرات بيه
يجاسم قوم ريت الموت بيه
صدق رايح يجاسم هاي هيه
تخليني أون الليل واسهر


اجت زينب و دمع العين غدران
او صدت للخيم نادت النسوان
قومن جاي نلطم على الشبان
تهاووا مثل مهوى النجم من خر

عطر الكفيل
15-01-2011, 10:12 AM
وداع النساء للحسين
====
على الشبان يا قلبي تفطر
تهاووا مثل مهوى النجم منخر


فرن وحده تندب و لدها
او وحده تندب اخوتها اوسعدها
او وحده للولي تخمش ابخدها
او وحدة اتصيح يا عمي لمشكر

يا شبان يانجوم المخيم
يبدور اشرقت ويلي اببحردم
يالله يا هوى الغربي تنسم
بلشي تفوخ عنهم جمرةالحر


تذعذع يا عذبي على الشبان
بالرسريس لا تنقل التربان
ترا هي اتبب من النشاب و الزان
لا تعصف تهز الزان وتضر


غديتوا طبق يا شبان و احسين
ظل او حيد بس ايدير بالعين
لمن شاف روحه ماله امعين
او شاف الخيل على الصيوان تفتر


لقف صلب العرج ملس الحديدة
روطها او غداها اعجود بيده
خاض الموت شن (كن) الموت عيده
الحسين او ما يخاف الحرب يستر


ليش الموت لحمر راغ واصفر
اثاري احسين بالميدان يفتر


حليف السيف و البيرق و ليفه
حلولك فوق راسه بسرفيفه
اششم حران مدرع بس رجيفه
تسمعه و الحرب بالسيف محتر


من يقحم على الليث ابعرينه
يجر يسراه و السيف ابيمينه
من يرقاه على امتونه او يهينه
يعيش او بين اذان الموت يصفر


دق بالقاع رجله و غدت ظلمة
تموج و يجف بيها فوق عزمه
امروس ينضح الكترين سمه
تشف الناس كلها منه الشر


او ويلي من وقف بين الخواتين
ينادي من يجاهد دون لحسين
طلع زين العباد امن الصواوين
يقوم ابشيمته و بالمرض يعثر

عطر الكفيل
15-01-2011, 10:13 AM
خروج الامام زين العبادين
====
اويلي اعلى العليل اطلع امصفر
عليل و مثل صل الرمل مصفر


يصيح ابصوت تجري بيه كل عين
يعمه اسلاح اجاهد دون لحسين
يعمه بعد ابويه اوجوهنا وين
و ام چلثوم من بعده اتعثر

اهنا يإ بني تگله دسدر اردود
ترا گلبي يعمه خزن اچبود
اشوفك يابن اخوي و لوعتي تزود
او نار احسين بين احشاي تسعر


صاح احسين يام چلثوم وديه
يخيه ابني شعب گلبي درديه
مهو روحي ابهذا الحيف لفديه
او نور العين و الفرگاه ما اگدر


يبويه انت الولي للناس بعدي
يبويه انت البيدك حكم جدي
يبويه ابشوفتك فتتت چبدي
هدر و ادموعه ابعينه تغرغر


رده احسين للخيمه و عينه
تسح ادموعها او يندها سكينه
يبويه ابن ابوچ الطفل وينه
اودعه او عبرته ابصدره تكسر

عطر الكفيل
15-01-2011, 10:17 AM
الطفل الرضيع ونخوة العباس ع

طفل احسين ظامي و الوكت حر
أويلي امن العطش چبده اتفطر


تگله الطفل راح اللون عنه
يبويه بالطفل ما بگت(بقت) ونه
جف دمعه او جف اللبن عنه
او ظل ايلوج بلسانه ويفغر


يبويه ما ابعيني دمع و اسجيه
لو يرضى الموت بيه الساع لفديه
يبويه شوف چيه ساوى العطش بيه
يبويه امن العطش چبدي اتفطر


قامت شالته و جت الوليها
فگ اعوينته يبحرعليها
يتخيل جايبه اميه بيديها
شاله احسين و ادموعه تنثر


قامت تستدير اعيون طفله
شبح عين لبوه و عينلهله
آيس شاف ميه ما حصل له
رد غمض اعويناته وسكر


شمه و حبه ابصدره او خده
او چبد احسين يابس مثل شبده (كبده)
يبويه ما بعد للعيش رده
اهوا ايحاچيه و لن سهم المقدر



طاح الطفل للقاع وتعفر
و دمعه مثل ماي العين فجر


تلگى احسين دم الطفل بيده
اشحال اليچتل ابحضنه اوليده
مال و ترس چفه من وريده
او دبه للسما او للقاع ماخر


اويلي من لفت سكنه تنادي
يبويه العطش هالفتت افادي
صدت لن اخوها الطفل غادي
يلولح رگبته او دمه ايفور


يبويه ذاب چبدي او چبدة امه
دخليني اودعنه واشمه
يبويه ليش ما تسجيه دمه
بلچن چبدته تبرد من الحر


يخويه عون من حبك و شمك
يخويه عون من راواكلمك
لغسلنك يخويه ابفيض دمك
او گبرك بالگلب يا خوي لحفر


گام احسين يمشي يم لنصار
و گف يمهم او چبده امن العطش نار
نده عباس خويه و الدمع نار
يخويه گوم لينا الساع واحضر



أبو فاضل دگوم الساع واحضر
او شوف الخيل عالصيوان تفتر


يخويه ليش هالنومه الطويله
يخويه الطفل عقبك طال ليله
يخويه ما چنت تسمع عويله
يلوج امن العطش لمن گضى وخر


يخويه آيست سكنه امن الماي
تجي يمي يخويه توقف احداي
يخويه امن العطش رادت تجي او ياي
او تگلك وين وعدك ياامشكر


يخويه ما درت لنك رميه
او هي ابرجواك تسجيها (تسقيها) اميه
يخويه امنين إجت ليك المنيه
او تگضي بالعطش و السيف والحر


يخويه ليش هالساعه عفتني
غبت عني يخويه اوضيعتني
مهو افراقك شعب گلبي و فتني
او نارك بالقلب ياخوي تسعر


رد و اعياله امن العطش يومن
او صاح ابصوت للتوديع قومن
مثل سرب الگطا گامن يحومن
تطيح اعليه وحدتهن او تعثر

عطر الكفيل
15-01-2011, 10:18 AM
وداع النساء للحسين
===
على اوداع الحسين القلب محتر
يگلبي ذوب لوداعه وتفطر


إجت زينب او باگي الحرم يمه
او صارت للوداع اعليه حنه
يشم سكنه و هي گامت تشمه
يحبها و الدمع ليها ايتنثر


يبويه ايطول بعدي ونينك
او مثل النيب چن اسمع حنينك
يبويه لا تشوفيني ابعينك
أخافن ينخطف لونچ اويصفر


صد الباجي اعياله ابعينه
بچن عنده او نادن يا ولينا
عسن للغادريه لا لفينه
او لا بينا يوالينا اتحير


أجت زينب يوصيها ابلعيال
يوصيها ابعليله و كل الطفال
شاف الدمع فوق اخدودها سال
تگله على افرگقك مگدراصبر


گام ايهون افراگه عليها
او بين بعد الله وليها
عگب ماجاب كل الصبر ليها
ركب غوجه و للميدان سدر

عطر الكفيل
15-01-2011, 10:20 AM
الحملة الأخيرة ووقوع الحسين في الميدان

====

ليش الموت لحمر راغ واصفر
اثاري احسين للميدان سدر


سدر و اعلن ابحد السيف ناره
او لعالي السما ثور شراره
خلى الليث ما يندل فراره
يفر و يجيه موت امنين مافر


تفر اقرومها او يحطم عليها
يحوم ابها او يحوم الموتبيها
چم حران ذبه عند اديها
او خلى الخيل بالهامات تعثر


فل اجموعها اولف الروايا
ابسيف رضع من ثدي المنايا
شگ الزلم و الخيل السبايا
چدسها او ذب لزرق فوق لحمر


صك الخيل و ادعى الخيل طشار
ابسيف للدرع و الطوس فزار
روى العود سوى الصار ما صار
او چبدها من العطش ويلي تفطر


دار العسكر اعلى احسين ياحيف
ناس بالرماح و ناس بالسيف
يشبه دورها اعلى الليث المخيف
بياض العين يصبيها ايتدور



دار العسكر اعلى احسين وافتر
او صار اشبيح للنشاب مكور


تلگى انبالها احسين ابوريده
نوب بالضلوع او نوب بيده
تلايم غيمها واسجل رعيده
او بالزانات فوگ احسين يمطر


ثگل ما يندري بنشابها امنين
يجيه اوزانها يخطف على احسين
سهم بيده و سهم ابحاجب العين
يويلي و افغرت روحه من الحر


صار اشبيح بيه امن المنيه
الف نبله يويلي و تسعميه
وگف تبة نبل بالغادريه
او زور ارماح شابچ عيب ينطر

أوچب يستريح احسين ساعه
ضعف حيله او ثگل بالسيف باعه
رن الحجر من وجهه ابشعاعه
او دمه مثل ماي العين فجر


شال احسين ثوبه اليمسح الدم
او لن سهم المحدد ناجع ابسم
ابگلبه وگع لا وخر او جدم
هوى و اظلم هواها و السما احمر





ليش اظلم هواها و السما احمر
اثاري احسين من فوق المهر خر


يرضنا اليوم ميدي و يا سما مور
او بعد احسين يا ما يالبحر غور
يا گلبي ديذوب او يا دمع فور
او يا چبدي على افراگه تفطر

هوى و المهر قام ايحوم دونه
يحامي عن وليه من يجونه
خاف القوم لنه يا خدونه
او يركبه غير خياله المشكر


عگب ما آيس الطماع منه
رد روعه او راح الخوف عنه
صهل و اعول او حن او جذب و نه
سحب سرعه او لعند احسين سدر


جنح فوق راعيه او شمه
او صار اضلال دون الشمس يمه
مرغ وجهه او ناصيته ابدمه
او نادى يالظليمه او للخيم فر


بچت سكنه او نادت بالمذله
يعمه المهر حط بالگلب عله
طلعت صارخة زينب تگله
يمهر احسين وين احسين خر



يمهر احسين وين احسين اخر
ما لك روعت قلبي يا مكدر


يمهر احسين وين احسين گلي
اشوفك جيتني تصهل ابذلي
اخلاف احسين گلي وين أولي
ما لك روعت قلبي يامكدر


يمهر احسين گلي عن وليي
بعد فيّه يخايب بيشافيي
چم اصواب اصواب گلي ابگلب اخيي
او من ياجرح دمه ايفور أكثر


اهنا گلي يصير اعلاج لحسين
أفت گلبي و ذر جرح الگلب زين
و انگط فوگ جرحه ابدمعة العين
بلچي اصواب اخويه احسين يخدر


گام ايهمش اصفاحه ابسنه
يدگ بالگاع رجله و يجر ونه
و بباب الخيم رجليه ثنه
دگ راسه او سالت دمعته اوخر


فرن يمه ايجبلن اجروحه
ابگلب خافج او عبره سفوحه
لكنه ايلوج و يعالج ابروحه
يون واصواب گلبه يفور





اجت زينب تصيح الله اكبر
يخويه ليش هالنومه ابهالحر


بچت زينب او نادت يا ولي
ينور العين يا عگلي وخي
يخويه الصبرمن بعدك امعي علي
او نار فگدك دوم تسعر


يخويه من ضرب راسك ابسيفه
طعن گلبك ابرمحه و اخذ حيفه
او ما خلا ابروحك بس طريفه
خفيه او شافها الموت المگدر


يخويه من سمعت المهر يصهل
تخيلتك ابجود الماي مجبل (مقبل)
أصد لن المهر محرب او معول
جالب عدته و السرج يصفر


على امصابك لحرم لذة العيش
بعد فگدك يخويه احسين ماعيش
يخويه اصواب كلمن مات بالريش
او جرحك بالگلب يحسين يسعر


على امصابك لجيمن دوم نوحي
يعيني بالدمع اليوم طيحي
امصابك ياعيوني شعب روحي
لونه بالصخر ذاب و اتفطر


تصيح ابصوتها ياحسين وينك
يخويه جاوب او صد ليابعينك
يخويه ذاب قلبي من ونينك
يخويه موش گلبي صخر مرمر


فك عينه او زرگنها او شبح ليها
او حن او خرت ادموعه عليها
لما صدت لعد دمعة وليها
ليل و فوگ جرحه يجلب احمر

عطر الكفيل
15-01-2011, 10:21 AM
رفع راس الحسين على الرمح

راس احسين فوق الرمح مسفر
مثل البدر بالظلمه اينور

لمن شافته صفگت بيديها
او شگت ثوبها ويلي عليها
ما تنلام من شافت وليها
فوگ الرمح راسه ايلوح بالبر

سالت عينها بدموعها اعليه
او شالت راسها و اتلفتت ليه
خفگ ويلي گلبها و اومت اعليه
او صاحت باچيه ابصوت مذهر

عسى ابعيد البلى راسك امعلگ
يخويه و جثتك ابگفر هس ملگ
او گلب اختك يخويه اساع خفگ
او طار و حام عد راسك وفرفر

اويلي اتلاگفوا راسك بلرماح
او شيبك آه تلعب بهالأرياح
و مصوت عدونا بالغنا صاح
ايذلنا امكيف او بالنصر مستر

يا شيال راس احسين ريض
جيم ابراس اخويه لا تعرض
شوف الدم من عيني اتفيض
او نار الگلب لفراگه تسعر

عطر الكفيل
15-01-2011, 10:25 AM
خطاب زينب مع حامل الرأس وخطابها لبني هاشم وهم صرعى وخطابها مع رسول الله صلى الله عليه وآله وسلم



ـــــــــــــ

ـــــــــــــ

يا شيال راس احسين قصر
ترى قلبي على افراقه تفطر


يا شايل راس حامينه او ولينه
ريضخل اتودعه اسكينه
ليش احسين ساچت عن ونينه
گلي تعبلو جرحه تخدر


يا شيال راسه لا تلوحه
او هيط عن بقايا الروس رمحه
خاف ايفوت ريح الهوى ابجرحه
واصوابه عليه ايگوم يسعر


يا شيال راس احسين سدره
رده الجثته او وسده ابگبره
يخايب شفت هذي گبل نجره
ابگبره جثته او راسه امسير


ياشيال نعشه لا توجعه
اخاف تلچم اجروح البضلعه
دريض لي اريد اسا اودعه
او هذاافراگنا ما بعد مسدر


يا شيال نعش المات مظلوم
على الشاطي و عن الماي محروم
تحوم اگلوبنا فوگ النعش حوم
اخوي الطاح مثل النجم من خر


يا شيال نعش احسين بهداي
اوبالله دحط تابوته على الماي
اريد اوگف و غسلنه ابيمناي
و شوف اصواب گلبه ما تغير


رفع باعناده راسه و شاله
او خيب زينب او يتم اطفاله
بس ما شاله او شافواعياله
اجت سكنه تصيح الله اكبر



اجت سكنه اتصيح الله اكبر
يبويه ليش هالنومه ابهالحر


تصيح ابصوت يفجع من يسمعه
يفتگلبه و يرض صدره او ضلعه
يفيض كل عدو اعليه دمعه
يبويه ليش هالنومه ابهالحر



يبويه ليش ما تنغر عليه
مني سكنه العزيزة الهاشميه
يبويه اسا عدوي شمت بيه
ذليله ايشوفني ما بين عسكر



يبويه انروح كل احنا فداياك
دخدني للگبر ياحسين وياك
اهي غيبه يبويه و اگعد اتناك
وگولن سافر او يومين يسدر


يبويه اللي وقع من بين اديه
چتل عطشان ما تشرب اميه
يبويه ريت هالنومه هنيه
او منبعدك يريت الناس تسهر


على امصابك يبويه لصب دمعي
و خلياعليك نوح الليل طبعي
لحرم ما يجيس الگاع ضلعي
و لاگلبي بعد فرگاك يستر


يبويه گول لا تخفي عليه
هذي روحتك لو بعد جيه
يبويه انچان رايح هاي هيه
اخذني او ياك عنك مگدر اصبر


يبويه من شفت مهرك لفاني
ذاب الگلب و انخطفت ألواني
يبويه ايعود لي بيكم زماني
و شوف الدهر بيكم يرد يزهر


يبويه باد حيلي و حگ جدك
عسن للگاع خدي دون خدك
يبويه شال راس الدين بعدك
والدنيا اظلمت و الكون مغبر



بچت زينب او صدت للمدينه
يهلنا احسينكم گطعوا وتينه
اشو نوماتكم صارت اسنينه
دگوموا يال هاشم و الهظم مر



دگوموا يال هاشم و الهظم مر
شوفو احسين عالشاطي امطبر



تناديهم و حادي الظعن طوح
تگلهم يا هلي و الدمع يسفح
دخلي خيلكم بالصرع تطفح
و شوفواحسين عالشاطي امطبر


يهلنا احسينكم رضوا اضلوعه
اوشاف الموت روعه بعد روعه
يصد لعياله و يسچب ادموعه
يخافانها بعد عينه تيسر


يهلنا احسينكم ذبحوا انصاره
ابوفاضل تكور بالمعاره
او وج بگلب احسين ناره
دمع عينه على خده تحدر


يهلنا احسينكم نشفت ارياگه
اوراح أخوه او هد حيله افراگه
او عن ورده امعوج الموت عاقه
اوعالجها او دون العلگمي خر


يجدي گوم هذا احسين مدبوح
علىالشاطي او على التربان مطروح
يجدي ما بقت له امنالطعن روح
يجدي قلب اخويه احسين فطر






يجدي قلب اخويه احسين فطر
او عالجها او دون العلگمي خر


يجدي الرمح بفاده تثنه
يجدي وبالوجه للسيف رنه
يجدي او شيبه ابدمه تحنه
يجدي اوبالرمل خده تعفر


يجدي مات محد وقف دونه
او لانغار غمض له اعيونه
وحيد ايعالج او منخطف لونه
و لاواحد ابحلگه ماي گطر


يجدي مات محد مدد ايديه
و لاواحد يجدي عدل رجليه
يعالج بالشمس محد گرب ليه
يحط لها ظلال يا جدي من الحر



تناديهم يهلنا و لا لفوها
و لاجدها يجاوبها و لا أبوها
حنت و انقطع ظنها امن اخوها
اوشافت عالخيم صول العسكر

عطر الكفيل
15-01-2011, 10:26 AM
حرق الخيام
==
او ويلي عالخيم صول العسكر
او وجها ابنار و الدخان كبر


صال و نفج النسوان عنه
نفر كلطفل مدعور منه
صار اصياحها و النوح فنه
و لا واحد يذب عنها او ينغر


نهب ما چان بالصيوان موجود
و ثجل احسين ويلي صار فرهود
و لا خلا ابخيمتهم و لا عود
حرگها او لعند الخيم سدر


سلب ما چان عالنسوان موجود
بگت وحده على خوها ابروحها اتجود
دعاها بين مطروده و مطرود
تفر هذي او هذي ابذيچ تعثر


ابسوطه يضرب اسكينه و يردها
تشگف بيدها يكسر زندها
تجي زينب تخلصها او تردها
لماسوطه ابمتن زينب تكسر


چم امخدره ضيع دربها
او چم مذهوله روع گلبها
او چم مذعوره ابسوطه ضربها
او نفجها الكتر و الكتر بالبر

عطر الكفيل
15-01-2011, 10:27 AM
خطاب زينب مع أمير المؤمنين عليه السلام

يحيدر گوم لينا الساع واحضر
او شوف الخيل بالخيم تفتر


لعتب المرتضى واچثر اعتابه
وهيلن للتراب اعل اعتابه
اندبه و انتحب و اوگف ابابه
وگله اليوم يومك ياغضنفر


لو ان الليث ابونا اليوم يدري
اخوي احسين راسه اشلون مبري
لفاني و دمعتي اعلى الوجن تدري
فكنا امن السبي او لا تعذر


يصنديد الحرب يمخيف لسباع
يشيال الحمل لو طاح بالگاع
اخبرك بالحرم ها راحن اضياع
سبايا و بالردن ويلي تستر


يسلبها العدو و يشتم وليها
اوجاير بالضرب ويلي عليها
تهبط راسها او تشقف بديها
دمعها ايسيل عالوجنات محمر

عطر الكفيل
15-01-2011, 10:30 AM
الحمد لله رب العالمين


انتهت القصائد واتمنى ان تكون قد راقتكم

وان تكون مفيدة لمن يبحث عن قصائد للقراءة كخدمة الحسين الله يحفظهم


واعذروني من لتقصير ان كان في القصائد تقديم وتأخير او عدم تنسيق في الترتيب

الشاعر سيد علي الجابري
15-01-2011, 01:48 PM
اللهم صلِ على محمد وال محمد
رحم الله ابن نصار ورحم الله الشعراء
الماضين لما اتحفونا من انوار حروفهم
الشجية الاخت الكريمه عطر الكفيل
بارك الله بكِ لما تركتي من انوار محمديه
جعلها الله في ميزان اعمالك تحياتي لكِ
اخوكم الصغير
الشاعر
سيد علي الجابري الجنوبي

شمس الكفيل
16-01-2011, 04:39 PM
جزاك الله خيراً اختي عطر الكفيل على هذا المجهود الكبير في كتابة القصائد
ان شاء الله تكون بركة وعافية على ليدك ^__^
مأجورة ومثابة "

عطر الكفيل
17-01-2011, 11:59 AM
شكرا لمروركما

بارك الله حياتكما