لأن شايل هويتك يا علي الكرار * يعتبروني شيعي وذبحي واجب
السيف الشطر راسك على المحراب * بيه ردوا يذبحونا النواصب
ملّة بلاية رحمة وكلنا مطلوبين * ومنهم يا علي شفت العجايب
المفخخ من يفجر ما يميز بين * هاي هنانة طفلة وهذا شايب
ولهذا تلاحظ من يفجرون * تلقى عكال واقع عالكصايب
وتلكى هنا كتب وهنانة دستة أقلام * وجنطة على الرصيف ويمها طالب
حاضر بالمقابر سجلة الموت * بس المدرسة مسجلته غايب
واحنا إعلى المصايب مو جديدين * تدوّر وجوهنا تشوف المصايب
يعرفنا الحزن عرفة معاميل * وعلى قصصنا شكثر لوعات كاتب
تربينا وكبرنا بحضن عاشور * وفطمتنا المواكب عالمواكب
طفلنا ببطن أمه يشيب من الظيم * ومن تجيبه أمه تجيبه شايب
وعلينا الموت يركض هاي الأيام * مثل ركض السياسي على مناصب
وإذا هذا الوطن قررنا نبنيه * لازم مو فقط نبني المعايب
لازم قبل لا نبني الحياطين * نبني قلوبنا صارت خرايب
للشاعر حمزة حسين