عن فتاة احلامي ابحث مالكيت
وادري نص ديني الزواج ايكمله
الحلاه مطلوبه لكن مو اساس
من حلات الكَلب تحله شما حله
وشرطي الاول اني رايد بنت حلال
ومااظن تعجيزي شرطي ومعضله
وماترحب باليجي بوكَفه الباب
من وره الباب ام هلاوين وهلا
عدها كذله اميشه بستر الحجاب
وماشه العفه بشعرها مشكله
وللوجه تستعمل اكريم النقاء
والبراءه ارقى نوع تفضله
وخل تحط لرمش مسكاره عفاف
وبقلم غض البصر متكحله
بالخجل والمستحه محمره الخدود
وترطب اشفافها بحمره بسمله
وبسور قرأنها مطيبه الانفاس
والسانها يتعطر من ترتله
وتحدد الشفتين بأدب الكلام
حتى قول الماعجبها تبدله
والتراجي بالاذن ضد الحرام
ومايغش اسماعها اي مهزله
وكل اصابعها محابس من سماح
واسوار معصمها بتواضعها انطله
تحني اديها بحنه ادموع الدعاء
والدعاء بجف اديها تووصله
وتقنع بكسره خبز لو مرهه جوع
ورغم كل هاي البساطه امدللـه
والرياضه عدها تمرين الصلاه
وتقضي اوقات الفراغ بنافله
لا حرج خريجه من قسم الخشوع
بجامعه تقوى البنات مسجله
تعليق