تويت
بزغ فجر الشهاده بثورتك يحسين * طلع صوت الشموخ منور بفجره
طلع لجل العقيده وغايته الاصلاح * ماراد الكراسي ولا طلب شُهره
ماقر للدعي ماصافح الفجار * رفض كل المذله وفجر الثوره
دك ثاية نضال حسين للتاريخ * خط درب الشهاده وثبته بنحره
رسم بيده الخريطه ودون الدستور * شيد مدرسة احرار من فكره
شرع للفداء اشرف نهج موجود * اخذ اطهر وسام وعلكه بصدره
منّه تعلمت الاحرار درب العز * اصبح موقفه لهل الشرف عبره
تاريخ الوطن جدامك ومفتوح * تصفح زين بالصفحات من تقره
شوف اجم شهيد القدمو قربان * ضحو بالنفوس الطاهره الحره
من ارض الطفوف النور كام يلوح * بدت تظهر شمسنه ولاحت الكمره
صارت كربله الهم عبر ودروس * من حسين اخذو موقفه وصبره
شافو هالوطن يتغطه بالاحزان * وبكلوب البشره حركه والف جمره
وأسنين التمر كلهه سنين اعجاف * طاغوت البعث جار وطغه بشره
اصبح هالشعب لكمه وسهل تنلاج * جن واكف وطنه عد شفا حفره
ارتفع صوت الغياره وهبت الافواج * ضد حكم الطغاة وهددت وكره
رغم ظلم البعث كله ورغم الاهوال * رفعو صوتهم للمادره ويدره
اهتز ركن الظلم من ارتفع هالصوت * خطوات البعث خلوهه متعثره
ماقبلو شعبنه ايعيش عيشة ذل * لان دمهم حسيني وطاهره البذره
ماهمهم مشانق لا غرف تعذيب * وسراديب الذبح واحقاد هالزمره
ماخافو سجون ولا امن لا جور * ظل هذا الوطــــن موقفهم يذكره
رفعوهه الرؤوس وعلو الرايات * لان عدهم علم رايتــــنه منتصره
ذلوهه السجون وذلو السجان * ودروع البعــــــــــث فافون متوذره
جادو بالنفوس وضحو الارواح * ضحوهه الدمــــه كطر بأثر كطره
كريم اللي يجود بدمه لجل الدين * كريم اللي يضحي الهالوطن عمره
تظل كل النفوس وكل دمه مهدور * تظل لابن الحسن بالشوك منتظره
ويظل هذا الشعب يتنطر الموعود * يظل بكل صـــــــبر يتنطر البُشره
حسين منجل العكيلي
تعليق