تويت
الشاعر السيد عبدالخالق المحنّه
يا هوى الشمالي...مر عله الغوالي
بلّغ إشتياقي ...و الجره إعله حالي
مر عله الراحوا و لا بيّن خبرهم
يا هوى و عندي الأهم سالم عمرهم
حته لو ناسيني هم أقبّل عذرهم
عمري يقصر يا هوى و طّول سفرهم
إستمع نحيبي...و إسرع الحبيبي
قله ما نسيته و أحسب الليالي
بلّغ أحباب القلب أجمل تحيه
قلهم إيسيل الدمع صبح و مسيه
لو إلي خاطر أوصيهم وصيه
هالله هالله يا هلي بأختي رقيه
منهو تشتكي له...فاطمه العليله
يا هلي سامحتكم بس يظل سؤالي
يا هوى سلم على أهلي و عمامي
بالخصوص الزينب إتودي سلامي
لو شفت عبدالله وصل له كلامي
قله آنا أتذكره حته إبمنامي
ما نسيته لحظه...نبضي ويَّ نبضه
السفر حلاله و السهر حِلالي
ينتهي ليل المواجع ونه ونه
و آني قلبي غير شوفك ما تمنه
بالله سافر يا هوى و إحجي لي عنه
شوفه ناسي لو بقت نفس المحنه
يا هوى إخبره...أعزل و أعذره
لو كثر غيابه يضعف إحتمالي
أيست شفت الحزن يحتل ربوعي
و إندثر وجه المسافات بدموعي
إتوغلت بأعماقي حسره و بفروعي
حسرتي معول يهشم لي ضلوعي
أكتب إبدربهم ...يا هوى أحبهم
و آني من هجرهم أحتمي بخيالي
للهجر أنياب تنهشني بعدهم
روحي ورده و عاشت إبغيمة وعدهم
ربي يالرديت يوسف ما تردهم
حنظل الأيام و اتأمل شهدهم
وينه عمي وينه...أنتظر حنينه
لا ذكر مصابي لا ذكر دلالي
من أشوف إبدارهم ذكره قديمه
أبقه أصرخ يا هلي و الله حريمه
من بعد هذا الصبر أصبح يتيمه
رد يبن حذلم و لا تحجي الهضيمه
صوته من سمعته...أركض و سإلته
قلي وينه بويه و آنا دمعي هالي
حسين منجل العكيلي
تعليق