شعر ياكرار ياحامي الجار

[كربلاء الحسين]

ياكرار** ياحامي الجار
******* *******
زينب تدري بيها شلون مهظومه **يَمها لوݘنت وتعايـــــــن الحومه
نادت من عله التل الصفّو نومـــه**بيمينك تصلها شايل الفقـــــــــــار
***********
حارت تعتني ألمن تشكي شكواها **سبيّه من بعد عزهــا يرجواهـــا
يريتك حاضر أبشدتها ويّاهــــــــا **نيــران العده تطفيهــــــا يامغوار
*************
اثاري الدنيه بيها من الظلم انواع **كلها اتكولبت عالحره ذيݘ الساع
بيش حسين مطلوب وتلمّه الگاع **الرذيله طبع أميّه أوخسّت الاشرار
***************
قادر ربّي هاي الگاع يطويهــــا **عسه بعينه العمه كلمن شمت بيها
سلّوها العقيله بطيح واليهـــــــــا **لادام العرش للظالــــــــــم ولادار
************
حيّرها الزمن يامه غدر وانكــر **سبيّه أم الحزن بالدمعه تتعثّـــــــــر
نواعيها وبݘيها للصخر فسّـــر **أريد ابدمعي أواسيها عالبو الاحرار
**************
لاتقبل الذلّـــــه ولاعطف شمّات **شموخ الزهره عدها تناشد الذمّات
كريمة الاصــــل تتحمّل الويلات**يجي يوم الفرج ونّادي وين الثــار
*************
عليل بعلّته متحيّر ويّــــــــــــاها **لايگدر يرّد الظيم لوجاهـــــــــــــا
يتألّم بكلبه وعلّته أخفاهــــــــــــا **آهات وحزن خلّت بكلبه النـــــــار
****************
شبه ماألها من ذاك الزمن لليـــوم **جازت بالدمع يعقوب عالمظلوم
صبر أيوب عدّت والگلب مهظوم **دليل أعله المحن اسم العقيله صار