(( حال العقيله))
من يرضه أبّين الشمّات
تواسيهه بس الدمعات
أتعاني حبل الغدّاره
ماظل حيله ولاجاره
************
تمشي شلون // بهذا اللون // عليهه مجودره الاحزان
اندار الكون // شمر ملعون // صار الحادي بالاضعان
دمع العين // صاح حسين // ضحايه أمشابكه التربان
العزم لاوين // بلا جفّيين// وحيده أتظل بلا خوّان
عيله أمجتفيهه حبال
من يتحمّله هذا الحال
ياكّلب التبرد ناره
ماظل حيله ولاجاره
************
عليله تروح // سلاهه النوح // ومن دمع الكَلب ونَّه
الروح تروح // عالمذبوح // بالطف عانت المحنه
عذاب الحال // صريخ اطفال // والسوط الرعه سنًّه
جفت آمال // والترحال // وزينب ماتحب منَّه
مثبوره وثجيلة هم
ليل أحزانهه خيَّم
ونجومه عدهه اسراره
ماظل حيله ولاجاره
************
بليل الهم // الدمع من دم // تبات وتصحه عالدمعه
شمل ملتم // عله حزن وغم // متعايش أويه الفجعه
كَلب مطعون// دماء تهون// أحبَّه عله الثره صرعه
فيض ظنون// دمع عيون // كل واحد طفوا شمعه
مطاعين وضحايا تشوف
متوسده بأرض لطفوف
والدم يطلب بثاره
ماظل حيله ولاجاره
************
بحرم تحتار // بين النار// لاوالي اليحاميهه
زغاركبار // غدت طشّار // الدهر ظيمه جره عليهه
ونين وآه // واويلاه// الاعزَّه تروح ناسيهه
بكت تنخاه // تريد حماه // سبيَّه أخذوهه تاليهه
خلَّت عالثره المظلوم
وتحرَّم عليهه النوم
وظَّت بالكلب ناره
ماظل حيله ولاجاره
************
تعليق