عهد توفيني

[خالد محمد مهدي الحجار]

عهد توفيني
***********
بيني وبينك ** عهد توفيني
تاخذني وترد بيّه
تالي أخذوني مسبيّه
يابعد عيني
****************
حرام عالدهر ضيّعك من عمري **رماني بيك يافخري وكسر ظهري
أبݘي عليك من دم ياذخر خدري **گمت أتوݘّه عالهم وحمل بصبري
ظليت اعاني**لوعة زماني
وبݘم حسره يوميه **تالي اخذوني مسبيّه
***********
يدگ عالباب ݘفّك ودري بيك حماي **تگلّي يالعزيزه أمّني بيمنـــــــــاي
عمود الخيمتݘ سيفي وغطاها ألواي **يابت حيدر بروحي وحياتي وفاي
طلعت ويّاك** أبأمان حماك
ششكي من الجره أعليّه **تالي أخذوني مسبيّه
***********
عصابة راسي صبري ودمعتي تجرح **يعاندني زماني اشلون بيك أفرح
شوصف حالتي من بعدك وأشــــــرح **وخيل اعدانه وسط خيامنه تسـرح
النار بخيامي**بالرعب أيتامي
العتره اليوم منسيّه ** تالي أخذوني مسبيّه
***************
أمرن عالشريعه ونظر ݘفوفك ** حالك مايسّر ناظــــــــره ليشوفك
تمنّيت أبمكانك أبقه ماعوفــــــك**رحت منّي أوبگتلي صورة طيوفك
روحي ياغالي **تبݘي عله حالي
الگمر جافي لياليّه ** تالي أخذوني مسبيّه
***************
ياستر الخـــــــــــدر يحماي أوِدنّك **جنت للكلفه بحساباتـــي أعدنّك
يصيح الصوت مني ارجع أريدنّك **ويريت آمالي لمصيبتي أيردنّك
بحرم وأيتام ** لارض الشام
ضيّع فجري أمانيّه ** تالي أخذوني مسبيّه