تويت
نواعي لمصاب ابي الفضل ( ع )
.......................................
..............................
انعه البطل عباس ليث الغاضريه
هم انچتل عطشان مثل حسين اخيه
غيره وْشجاعه وْجود فخر الهاشميه
وفّه الابو الزهراء والحامي الحميه
.........
عالمشرعه العباس من جابل زلمها
الكَوم الكفرلَانْذال شرّدها وْرعبها
صولة علي الكرار فن واحد يصدها
لوله الغدر چفِ البطل فنّه الوصلها
.........
حامل لواء حسين عباس وْعضيده
چنّه الاسد بالموزمه والرايه بيده
ما ينچتل هيهات لولاها المكيده
رمز وْعلم للدين صار اسمه وْشهيده
.........
علّي الونين اليوم گوم اضرب عله الراس
ون عالهمام الليث وانعه الصاب عباس
عالمشرعه غدروه گوم العار لَانْجاس
واشما ننوح اعليه ما نوفيله يا ناس
.........
مْورّم گلبنه عْليك من هاي الرميه
بْحسره وْالم ننعاك ليث الهاشميه
تنعه بْعزانه عْليك ويْانه البريه
وْتلعن سليل العار واصل الشر اميه
.........
غيره وْ وِفَه العباس يحتار الوصف بيه
بالمرجله والجود ياهو اللي يضاهيه
بالغاضريه افواج ما گدرت تلاگيه
وْ لا صمدتِ الفراسان گدّامه وْ تلاويه
.........
دگ باب ابو الحاجات بدر الهاشميّه
وانخه الجليل بْحضرته من كل بليّه
عنّك تروح المشكله تْروح الاذيّه
عالي وْ عظيم الشان يم رب البريّه
.........
نبچي عليك دْموم والينه يعباس
يا حيف يا بو المرجله غدروك الانجاس
مْصابك نذكره وْللابد وانعلِّم الناس
الصار وْجره بْطف كربله من فعل الارجاس
.........
حگچ عله العباس يا زينب تونّين
ياهو المثل بدر الهواشم يا خلگ وين
ساقي العطاشه بْكربله وحْزام الِحسين
لمْصابه واعليه شْجره تنزف دمه العين
.........
ليث وْ بطل عباس جاهد كل حياته
صد الظلم والجور حارب كل طغاته
غيرة علي الكرار يحمل كل صفاته
طاع النبي المختار دافع عن ولاته
.........
رفضت لذيذ الماي هالنفس الابيه
بنفسه العزيزه يْجود جدّمها الاخيه
ما بايع الظلّام واشرار البريه
تشهد لبو النوماس ارض الغاضريه
....................................
..........................
خادم اهل البيت ( ع )
الشاعر الحسيني
سعيد الفتلاوي الطويرجاوي
تعليق