تويت
مشايه جينه الحضرتك مشايه
ومن الزغر يحسين الك وفايه
كل شي الك ضحينه .. وابدا فلا ملينه
ومن الزغر يحسين الك وفايه
عفنه الديار وعفنه كل مابيهه
جينه ابطرك ارواحنه وتدريهه
من الزغر منذوره الك واليهه
ولجلك الدنـيه سيدي امـطلكيـهه
عالمذبح اصطفينه .. صحنه فده الولينه
والموت لجلك نشتريه اشرايه
عالجدم نمشي والدمع نص العين
يهـمـل ومافارك ابـد هالخـديـن
باسمك انردد سيدي وابـكل حـين
منتوب منك عاشكينك يـحسين
وغيرك فلا حبينه .. ياسيدي وتدرينه
ارواحنه بحبك تضل ودايه
ويانه اطفال وحرم جبناهه
كلهه ابسواد اتوشحت محلاهه
وطول الدرب راياتنه ارفعناهه
بيهه نواسي الحره نتلكاهه
بدمعتنه الج واسينه .. يبت حيدر علينه
اويانه طول الدرب تبجي الرايه
اشكد حاولت اهل الغدر تمنعنه
واشكد حملنه الأم واتجرعنه
لكـن فلا عـفناك واتكطعـنه
ولجلك يبو السجاد هل مدمعنه
ونيران لهبت بينه .. وانت الذي اتطفينه
وحبك نهر ماينشبع من مايه
هذا الدرب يشهد عله انصارك
كل سنه تتعنه مشي زوارك
ورغم الخطر جانت تجي لديارك
واتصيح والله مانسينه ثارك
يبن بضعة نبينه .. ثارك فلاناسينه
ابركبتنه دين ويبقه هو الغايه
اليذبحنه يرجف واحنه مارجفنه
واعله المذابح سيدي هتفنه
لجلك دمانه ابكل شرف نزفنه
وماخنه وياك العهد تعرفنه
نفدي الذي يفدينه .. ولمنهجك وفينه
والموت لجلك نعتنيه اعنايه