طير الأحزان

[سعد مطلوب]

(( طير الأحزان ))

ياطير الأحزان بدموعي انخاك ... من تمشي لحسين تاخذني ويّاك
انه العليله حايره خلوني ... سهرانه ليلي اودمعتي بعيوني
ياطير الأحزان
************
انه ياطير الحـــــــــزن عُمري خسرته
من زغر ســـــــــني الهظم والله حملته
ابســــــــاعة الراح الظعن دمعي هملته
وگعدت وســــــط الدرب انحب ابسكته
صُفيت انشد سواد الليل ... بلچن ينخه نجم سهيل
يشد بيّــه النفس والحيل
يرولي أخبار عن والدي حسين ... يمسحلي الدموع بچفوفه الثنين
يرضاها ابقه ابحسبتي وظنوني ... سهرانه ليلي اودمعتي بعيوني
ياطير الأحزان
************
تدري ياطير اشــــــــــكثر شلت الاذيه
اوذاب من كثـــــــر البچي ثوب العليه
هام فكري اوصرت امشي إِعله المنيه
والصبُر من عنــــــدي مل اوگطع بيه
تركني اوما حضر يمي ... الوج ابلوعتي اوهمي
نحل من الهظم جسمي
من كثر المصاب خاويت الآلام ... يم عتبت الباب صرت ارسم احلام
بعد الابو المن ابث اشجوني ... سهران ليلي اودمعتي بعيون
ياطير الأحزان
************
والله ياطير العُمر مايســـــــــوه عندي
من بعـــــد غيبت هلي ظل جفني يدي
گلّي شــــــــلّي ابدنتي لوعشت وحدي
ريت تاخـــــــذني لون بالسرب تحدي
نسافر فوگ جنح الريح ... وبصوت المحنه انصيح
لجل نسمع صده التسبيح
وگطع إِنه اوياك كل المسافت ... وتخطّه عالموت رغم الجراحات
تدري هلي من سافروا عافوني ... سهرانه ليلي اودمعتي بعيوني
ياطير الأحزان
************
انه من كثـــــــــــر الصُبر كلبي تفطّر
والدمع فوگ الوجــــــن طاح اوتكسّر
تدري لغيـــــــــاب الأهل چبدي تفسّر
صرت محنيت ظهر بس امشي وعثر
صُفت داري تون اوياي ... تصيح شلون تاه الراي
بعد من يسمع الشكواي
مكسورة اجناح محتاره بامري ... انحب عله الراح عذبني دهري
ضلّيت احن حن الهجن لظعوني ... سهرانه ليلي اودمعتي بعيوني
ياطير الأحزان
************
هاك ياطير الكلب خـــــل يمشي بحماك
خاطر ايبــاري الدرب لوصرت بسماك
اومن دمع عينه إِرتوي لو مسّك اضماك
بلچن ايشــــــوف الأهل بدموعي ارجاك
عليك ابجدّي جاوبني ... بعين العاطفه انظرني
صرت اتگبع ابحزني
بيه تشب نار اتنطّر اجواب ... يوصلني مرسال من كترالأحباب
والله الوِسن مامر ابد بجفوني ... سهرانه ليلي اودمعتي بعيوني
ياطير الأحزان
************
لوردت ترحــــل اهل إِعليــــــــك عبره
شــــــلون ترضاها تخلّي ابنفسي حسره
والكلب لو ينكســـــــــــر ياهوا اليجُبره
خلص من كثــــــــــر الدمع ولآه عُمره
وحيده لا تخليني ... اظل مهمومه بسنيني
حرت ياهوا اليواسيني
عذبني الفراگ صرت أنشد البال ... هم يرجع حسين ويطيّب الحال
من هاجروا لليوم ماذكروني ... سهرانه ليلي اودمعتي بعيوني
ياطير الأحزان
************

بقلم / سعد مطلوب الخفاجي

[خليل علي الزبيدي]

بوركت اخي الغالي سعد مطلوب

[سعد مطلوب]

عزينا الغالي
أبو امنه
الله يبارك بيك ياطيب نورتني بمرورك النير
خالص شكري وامتناني تمنياتي لك بالموفقيه

[الأزري]

أبعد الله عنك شر الاحزان وطوارق الحدثان بحق صاحب الزمان يا أخ سعد

[سعد مطلوب]

الأخ العزيز
الازدي
ممنونك مولاي العزيز ربي يوفقك بحق
سيد الشهداء عليه السلام
نورتني وشرفتني بمرورك الطيب
تمنياتي لك بالموفقيه