أذا درب المشي عن كبرله يصير
بعد هاي الأرض عن الكواكب
هم نمشي لبو السجاد والله
وعلى طول الدرب ننصب مواكب ؟؟

ولأن تاريخ أنته امن الله مكتوب
يم اسمك حنت كل التواريخ
وكل خطوه ألك نمشيهه يحسين
على عروش الكفر تطلق صواريخ
بينه امراض طابت منهه الاجساد
لأن نلطم على مصابك مصاليخ
واكو لذه وشفاء بزادك تصير
لأن امك الزهرة اويه لطبابيخ ؟؟

وگبل العاشر احنه نطيح مفروض
لأن بالعاشر انته نعرفك اطيح
الجنان بطيحتك عالگاع يحسين
ألك سلمت البوب اويه المفاتيح
ولأن يدري الرمال عليك تنهال
وگف لمن طحت يم جسمك الريح
أسلام احنه گلي شلون ننساك
أذا حتى المسيح بأسمك تصيح ؟؟

چان الدود يلبس بيض الثياب
ودمع ماكو اعله خده ويضحك الدود
وبعد طفك الدود يصب الدموع
وعلى مصابك ثيابه تبدلن سود
الدمع لمن نهله عليك مولاي
يتحول ورد بطراف الخدود
ولهذا السبب كل البچو ليك
نشوف خدودهم چن واحة ورود ؟؟

تبچي النوگ لكن مو على النوگ
گبل لا للذبح تتعنه وتضوگ
لأن تذكر ذبحتك يوم الطفوف
أذن قصة ذبحتك بچت النوگ
وكل أنسان فكر لحظة ينساك
ثوب الستر عنده مطرز شگوگ
وبوجه اليضدك نصرخ بصوت
حسين الحگ يل مضيعين الحگوگ