تويت
اللهم صل على محمد وآل محمد
نسأل سؤال..
عود ليش نقلد المراجع؟
خو خلي منقلد ؟
كل انسان عنده عقل ويكدر يميز الصح من الغلط وينطي لنفسه حكم وهاي هية..
خو اوكي براحتك يااخي لتقلد .. بس اكلك شي ، اذا متقلد لازم تكون عالم بهالامور
عالم بالحديث
عالم بالروايات
عالم بالرجال
عالم باللغة
عالم بالمنطق
عالم بتفسير القُرآن وووو الخ
ولازم انت ذكي وتصير عندك ملكة استنباط الحكم الشرعي من الآيات والروايات حتى من توگف گدام رب العالمين باچر ويسألك عن كل حكم شنو دليلك لازم تجاوب جواب علمي دقيق بالدليل والمصدر الصحيح والروايات الموثوقة
ولانّه مايگدر كل إنسان على هذا الشي ف لازم فد شخص يتفضل علينا ويشيل هالتعب كله ويتكفل أن يتعب ويدرس ويسهر ويبحث ويستنبط ويكون عالم بالشريعة ونجي احنه ناخذ الحكم عالجاهز ..
وهذا هو اللي نسمّي (تقليد)
زين اكو يكولون احنه منحتاج تقليد عادي يعني مو الّا
نفس هذا الشخص اسأله
من تتمرض ليش تروح للدكتور يكتبلك علاج؟ خو انت شخّص مرضك واكتب علاجك واصرفه
عليمن تروح للدكتور وتنطي فلوس؟
انت ادرس طب وجراحة واقرأ الكتب الطبيّة وتعرّف على الادوية والمن يستخدم كل علاج وتابع اخبار الطب و... الخ.
حتى متروح للطبيب بعد وكلما تتمرض انت تداوي نفسك بنفسك باعتبارك (عالم بالطب)
تكدر لولا؟ اكيد لا لان مو كل واحد عنده قابلية ومجال يصير طبيب وعالم بالادوية !
زين هذا شيسمونه من تروح للطبيب ويكشف عليك وينطيك علاج مُناسب لمرضك؟
هذا يسمونه ( تقليد الطبيب) بالامور الطبّية والعلاجية..
وتاخذ بكلام الطبيب والادوية اللي كتبها الك بالراچيتة اللي مكتوبة بخط مايفهمه الا ابو الصيدلية.
وحتى بدون متفتهم ليش ينطيك العلاج الفُلاني والكبسول الفُلاني وهذا قبل الاكل وذاك بعد الاكل تاخذها وانت الممنون.
هذا هو التقليد وهذا سبب تقليدنا للمرجع لان هو مختص.