أَنـيـنُ الـفـاقِـدات
يَحيدر گُوم شُوف الغاضِريَّه
تَرَى زينب صُفَت بيها سِبِيَّه
غَريبه اوْ تِهْمِـل العين
تِصِدّ الْجِسْم الْحْسين
امْگَـطَّع بالسِيُوف اعْلَى الوِطِيَّه
***
يَحيدر مِن شِمِر گَص نَحْر الْحْسين
زيـنـب واجْـفَـه واتْـشوفَـه بالعـيـن
لا نــاصـر بُـقَـى عِـدها ولا امْـعـيـن
اتْـحَـشِّـم وين اُبُوي المُرتضى وين
يَحـيـدر مُـر عَلَـيَّـه
اوْ شوف الْصار بِيَّه
أُبو الْيِمَّه انْذِبَح مِن بين ادَيَّه
***
يَِحـيـدر ما دَريـت اشْـصـار بــيـهـا
تِـمَـنِـيِْـتَـك تِجيـهـا اوْ تِصِـد لــيـهـا
مـــن جِــدّامْــهـا ذِبْـحَـوْاْ وِلِــيـــهـا
رادَت تـوْصَلَـك مــا صَـح بِـديـــهـا
تِگِلَّـك يـا عـلــي روح
شُوف احْسين مَذبوح
اوْ داسَت فوگ صَدْرَه اخْيول أُمَيَّه
***
يَـحـيدر مُـر عليـها ابْـكـربـلا الـيـوم
عُـگُـب عينَك علـيـهـا جارَت الگْــوم
عَجَب مـا وُصْلِتَك مـن كربـلا اعْلوم
اتْشوف اشْكُثُر زينب حِمْلَت اهْـموم
گِضَوْاْ كل الهواشم
اوْ مَسْبِيَّه الفـواطم
اوْ زينب تِنتِظر حامي الحَمِيَّه
***
الـنُـوايِــب يــا علي زيـنـب لِـفَـنْــها
خَـذَنْ غَـفْـلَـه الـعزيز احْسيـن مِنهـا
تَـعَـدَّن لِـلـگُـمَــر چــافِٰـل ظَـعَـنْـــهـا
بَعَد يا هو الـذي ايْـرِدْهـا الْـوَطَنْـهـا
ريْتَك تِجِي واتْشوف
مِن گِطْعولِه الْچْفوف
اوْ عَليهِن بَــعَد قُبْلاتَكْ نَدِيَّه
***
إنْـــتَــه الْــقَـــبَّــلِـتْــهِــن بــالـولاده
اوْ تِــدري بــالــقَــتِـــل لـلآل عــاده
اوْ كَـرامَـتْـكُــم مِـن الله الشـــهـادة
وابـو فـاضـل لاخُوه حَـقَّـقْ مُـرادَه
مِثِل صولات ابًوه صال
اوْ جَـنْـدَل كل الْابْـطال
إلَـه الـبِـيْـض انْـحَـنَـت والسَمْهَريَّه
***
يَـحـيدر مِن وِگَـعْ حامي الـظَـعينـه
ظَـلْ سَــهْـم الـرَّدَى نابِـت ابْـعـيْـنَـه
اوْ راسَـه بـالعَـمـود امْـهَـشِّـمــيـنــه
وَحـيد احْسين ظَلْ مَـحَّد يَـعـيـنَـه
ايْحَشِّم خويه عباس
عَلَيَّه دارَت الـنــاس
يَخُويَه الخيل وُصْلَـت للثِنِيَّه
***
يَـحـيـدر مِن وِگَع بالحـومَه الْاكْبَـر
گَـلْـب احْـسـيـن لِـوْلِـيْـده تِــفَـطِّـر
اوْ دَمِع زينـب عـلى امْصابَـه تِفَجَّر
إجَـت لـيـلـى تِـصِــيـح الله واكْـبَـر
عزيزي اوْ عَمَد بيتي
خَلَـت مِـنَّـه ثِـنـيْـتِـي
يـَبُـو الْـيِمَّـه انْـهِدَم بيتي عَليه
***
يَـحـيـدر طـاح بالـمـيـدان جَـسّـام
عَلى رَمْـلَٓه قِـسَـتْ بالـطّـفّ الْايــام
هَـلاهـِلْـهـا لِـبِِـنْـها لَــطُـم عَـلْ هــام
واشْمـوع الـعِـرِس طَـفَّـتّـها الْسْهام
ريت المُجتبى ايْشوف
مِــن زَفَّـنَّـه الْـسْـيُـوف
اوْ صارَت حِنِّـتَـه كاس الْـمِنِيَّه
***
يَـحـيـدر طِـفْـل ابُو الْـيِِـمَّـه تَـعَـنّـوه
اوْ هُوَّه ابْحِضْن ابُوه ابْسَهَم ذِبْحوه
اوْ شِـرْبَةْ ماي گَبْـل المـوت حُـرموه
جـابَــه لِـلـعَــقــيـلَــه شـايِِـلَــه ابُـوه
يَزينب يَخْتِي غَطِّيه
خافْ أُمَّه تِصِـدْ لِـيه
ايْموتَنْ هِيَّه واسْكـيـنَـه سِوِيَّـه
***
مِن شـافَـت رَبــاب احْسـين مِـكْـدَر
حِچا اوْيَا اخْتَه اوْ لِـعِـدّ الگوم سَدَّر
إجَـت نـوبَـه تِـگُوم اوْ نـوبــه تِعْـثَـر
اتْـريـد امْن الـعـقـيـلـه تِـعرِف الـسر
يـزيـنـب خَـبِّـريــنـي
اوْليدي اوْ ماي عيني
شُـو ما جابَـه ابُـو اليِمَّـه إِلِـيّّـه
***
يَزينب شِفْتْ ابُو الْيِمَّه حِچا اوْياچ
عَلـيـچ أُمِّچ الزهـرَه يَخْتِي شِـطّـاچ
اشْـغَـطَّيْـتِي يزينب شِـنْـهي بِغْطاچ
دَخَـبْـريـنـي يَبِـت حـيـدر اتْـرَجّــاچ
تَرَى گَـلْـبـي لِچَمْـني
بَسْ لا ذِبْحَـوْاْ ابْنِـي
لا تِـخْـفـيـن يا زيـنـب عَـلَـيَّـه
***
زيــنـب جـاوِبَـت والـدَمِـع سَـچَّــاب
شَــگِـلِّـچ بـالـجَـرى يَـخْـتِـي يَــرَباب
ابْـنَـبْــلَـةْ حَرْمَـلَـه عـبـدالله انْـصـاب
هاچ ابْـنِـچ تَرَى مِـنِّـي الْـگَـلُـب ذاب
بَـعَـد مَگْدَر أشُوفَه
امْحَنّـايَه اچْفـوفَـه
ابْدَم نَحْرَه الْـمِشَى الْـرَبّ الْـبَرِيَّه
***
خَـرَّت عَـلْ طِـفِـل مَـدهـوشَــه أُمَّــه
نـوبَــه اتْـشُـبْـگَـه اوْ نـوبَـه تِـشِــمَّــه
الْـصَدِرْها ابْـشـوگ وابْـلَـهْـفَـه تِضُمَّه
تِـگِـلَّـه ادريك عَطشان
يَـبَعْـد أُمَّك اوْ جوعان
يَـروحي ارضَعْ حَليبي دَر عَـلَـيَّـه
***
كاظم البياتي ( Kadhim al-bayati )