تويت
تمنيت آني طير
تمنيت آني طير وأعبر الأزمــــــانْ
وأوصل لارض طيبة وأعبر البلدان
******
وطِير بأرض شرفها النبي المختار
واسمع صوت حل علَ البشر خطار
وعيش ابيين ذيج الناس أحله نهار
ميلاد ابو الزهره وجنــّة الرحمن
*****
وعاين علَ اصنام منكسه الهامات
واصحاب الرذيلة مكسره الرايات
بعد هيهات يتعافه الكفر هيهات
نولد صوت الكرامه ورفعة الإنسان
******
وجن روحي بسمه طيبه خذاها الشوك
ورفت فوك بيت المرسل المعشوك
وأكـَّله يا أمين الدين عدنه حـكـــوك
ضيوف اليوم عندك ياعظيم الشان
*****
واخاف اوصل الحجره البيها حل النور
لان بيرغ الهيبه عل السطح منشور
وصرت مثل الحمامه البيها رهبه تدور
واريد اعرض خطابي ومايصح لي لسان
******
يـاقلب العطف جيتك ياجفوف الجود
ياحبل الاله وللعرش ممـــــــــدود
ياتاج الفضيله وكلمة المــــــــعبود
شاهد انته دون الخلـك عالأكوان
*****
عاين حالنا وباصر لواقــــــــــــعنا
من خفة عملنه الريح تدفــــــعنا
تكاثر ضيــــــــمنا وزادت مواجعنا
حتى اللي تعافى من الوضع تعبان
******
ولن واحد شمرني حجاره من بعيد
وناداني يطــــــــير بهل البلد شتريد
سألته منهو إنـــــــته كال جد يزيد
ياهل الطير إرحل آني ابو سفيان
*****
ورجعت وي الزمن هذا الزمن رديت
ولحجرة نبينا ياخلــــــك مريت
شفت نفس الوجوه النايمة ويَ البيت
شالت لي العصا ونادتني يابطران
*****
بعـِّد عن الحجره ولاتــــــــــصل حدك
أضنك رافضي وبس الشرك كصدك
صحت ياسيدي حرمــــوني من عندك
يـكولون اليزورك يعبد الاوثان
*****
رْجَعـِتْ لارض العراق لكربله تعنيت
زرت ابنه الحسين وتربته شميت
ويم عباس ياسيد الرسل ناديـــــــت
وشفت خدام طـَيبة تفتح البيبان
******
خدام النبي خــــــدام أبو الســـــــجاد
وخدّام المراقد شمــــــــعه للوفـَّـــاد
يرب اجعل بلاد حســـــــين أحله بلاد
بجاه المصطفى وحيدر وصي الإيمان
*****
أبو آمنة
تعليق