علي خبز اليتيم ... (لسان حال الايتام ) ... عبدالله الشريفي

[عراقي وافتخر]

عبدالله الشريفي

(لسان حال الايتام )
علي خبز اليتيم

لو بينه علي ماصار هذا الصار
ولا واحد تجره وداس عتبتنه
لو بينه علي كلهه تراهه بخير
ومو من وسط الحلوگ تروح لگمتنه
لو بينه علي ماتنكسر الايتام
ابسمة شفافة تصير جبرتنه
لو بينه علي ما شردانه العوز
لان جوه عباته تصير لمتنه
لو بينه علي چا والله امي بخير
وماتطلع تجدي تجيب خبزتنه
لو بينه علي ظلينه تاج الراس
ولا اهل الترف يشرون ذلتنه
لو بينه علي ماخالطانه الخوف
كلنه بذوالفقاره تصير فزعتنه
بس وينه علي ذبحته هاي الناس
وعلي على عناده الناس ذبحتنه
علي ياخبز اليتيم وعونة للمعتاز
علي ياچف الإله المسح دمعتنه
علي ياحنان الله والنبي المختار
علي يــا ود الجليل ورحمة شملتنه
علي ياسفرة الباري مدهه للمسكين
حنان وعطف ودموع واستنه
علي يا خدر الارامل ياحجاب الراس
علي ياكطرة الغيرة وماي گصتنه
علي ياقصة عشگ بس للفقير تلوگ
حبيناها من الطفولة وبيها نشوتنه
علي تبقى ابونه وبيك مكسورين
والك دمعة حزن ياعلي بذمتنه
نبچيهه عليك بكل وكت مولاي
والك تچوي الجمر مولاي حسرتنه
علي تبقى عشگنه من اللحد للموت
وبيوم الحشر شوفتك رغبتنه

[الأزري]

عظم الله اجوركم وتقبل اعمالكم

[باسم الربيعي]

تقبل الله -- في ميزان اعمالكم