كافل ضعوني العباس

[قاسم حتروش]

كافــل ضعـــوني العباس ** غيره وشجاعة ونوماس
بالمهــــد لــمّـــــن شفته
أختـــــــاره كفيلي الكرار ** بزوده أبـــد مـــــــا أحتار
ونعرف كافـــــــــل أخته
**********
بأول أيامـــــه بالمهـد * كلبي أنشرحله ونسعد
وعرفت عالي مقامه
بعيونه شاهدت ألوفـه * ويحمل علوم ومعرفه
غيـره مليان وشهامه
أمــــــه ألوفيه كمطته * وكطّع كماطه بغيرته
هــاي إله أول كرامه
قـبّــل جـفــوفــه والده * وسمعته أني وشاهده
كــــال يفديها الإمامه
يصيبه السهم وسط العين ** وتنكطع مــنّــه الجفين
عالمشرعـــه تضل جثته
مــــن والدي هـــل أخبار ** بزوده أبــد مــــا أحتار
ونعرف كـــــافـــل أخته
*********
أم الـبـنــيــــــــن ألربّــتـــه * من علم حيدر غذته
بسرعلي حمّاي جاره
أتمرّس على كلشي صعب * وتعلّم فنـون الحرب
وبيها أثبـت كل جداره
لــــو شاف الحسين أنحنه * ويكلــه خادمكم أنـــه
بس تأشــرون بإشاره
وللحسن هــــذه جلمته * ويكول واجــب طاعته
حبهم ربح وأعظم تجاره
مـــن أمه ماخـذ الأوصاف ** راعي ألوفه والإنصاف
تــــغـــــذاهــــــن بتربيته
ومـنـهـم تـعــلّــــــم الإيثار ** بزوده أبــــد مــــا أحتار
ونعرف كــافــــــــل أخته
***********
عـــد والدي عشنه سوه * هـــوّ إلـــي طب ودوه
وشوفتـــــه تريحلي بالي
من أذكر أمي وأنهضم * يشعر بـوضعي وينلجم
كلبه ويــــــون عله حالي
يمسح على خدّي الدمع * ويسلّي كلبي لمنصدع
بجلماته أتناســــه الجرالي
لو غاب فتره من الزمن * روحي تشب نار وتون
ويكثر على غيابه سؤالي
العباس عــنّــي لـــــو غاب ** أتـنـطّره خلــــف الباب
ومــــا أهــــده الا بـجـيـتــه
ويشرحلي كــــل اللي صار ** بزوده أبــــد مـــــا أحتار
ونعرف كـــــافــــــل أخته
********
بـلـيـلـة رحـيـلــه الوالدي * سلّــمه بيده الساعدي
وكلّه هاي الهاشميه
هـــــــــــذه وديعة فاطمة * الأمــلاك إلها خادمة
بذمتّك من هل مسيه
جهدك لجلها أتكرسه * ومحملها أنت ألتحرسه
لو كصدتوا الغاضريه
متعوفها يابــه الفضل * لحد مـــا يوافيك الأجل
فراكـــــم بس بالمنيه
صان الأمانـــــــة العباس ** بوجوده حـــــدّي منداس
بكلشي الأريــــده كصدته
ومـــا يوم قـــــدّم الأعذار ** بزوده أبـــــد مـــا أحتار
ونعرف كـــــافــــل أخته
*********
بطف كربله جـــان الأمل * حلقـــــة وصل بين ألأهل
يلبي كل اللي أريده
عسكر بوحـــــده نشاهده * مرعوبه مــــن أسمه ألعده
مو مـدح هـذه أكيده
من صاب العيال الضمه* بزوده أبن حامي الحمه
طلـــــع شال الجود بيده
جيش لعله الماي أرعبه * تملّك المــــاي ومشربه
وردد بصوتــــه قصيده
مـــــن فاض بالماي الجود ** كـــــل همّه لخيامه يعود
يــروي الـــــــــذي ناطرته
أبهمّه وعزيمه مـــــن سار ** بزوده أبــــد مـــــا أحتار
ونعرف كـــافـــــــل أخته
********
مــن النهر لــمّـــن طلع *عسكــر أميه اعلي فزع
بعينه ينظرهــم يراقب
جرّد السيفه مـن الغمد * والشافه من عدهم شرد
ورُعُبْ صايبها الكتايب
زلزال بالطـــف أنفجر*عالمشرعه ويـــــم النهر
شحدّه كل واحد يكارب
وسفه بعمد هامه أنطبر* وأنكطعـن جفوف الكمر
بمكر وبغدر النواصب
يــمّـــه كصـدت وتـعنيت ** جثته بلا راس لكيت
بهل حال مــــــن ودعته
وسبوني بعــــده الأشرار ** بزوده أبــد مــا أحتار
ونعرف كـــافـــــل أخته
*********
يالمهدي يــــا باب الفرج * يـا وارث الكـل الحجج
كوم شوفه الحال عمتك
مــــن يــــوم أمـها تنتظر* وتكـــول أتاني المنتظر
بلهفه تــتــنـطّر لجيتك
وأحنه نعيش بهل أمل * تنشر على الوسعه العدل
مــن تجي وتهل طلعتك
نمد أيدنه صبح وعصر* وبكل فريضه وكل فجر
يـعـجّل وينهي غربتك
نسأل البــــــــاري المعـبود ** يعجّل طلعت الموعود
ويـــشـفـــــــي كلبها لعمته
يــــوم لينـــــــــــادي بالثار ** بزوده أبــــد مـــا أحتار
ونعرف كـــافــــــــل أخته


الشاعر
خادم الحسين (ع)
قاسم حتروش البلداوي
خادمكم
أسألكم الدعاء