علي

[ابن الاهوار]

بسم الله الرحمن الرحيم
اللهم صلي على محمد وال محمد
علي بطاري اسمك عيون اليتامة تنام
بس يغفن بالمهن والجفن يدمع
يتامه بطونهم مالكت حل للجوع
والمايلكة حل من الصعب يقنع
علي منين ابتدي وانته تعرفهن زين
علي الشباج اسئلة شكد قصص يسمع
علي كون بعهد جنت انته تحكم بي
ترتد العقارب والزمن يرجع
ولو مودوم لو بس ثانية كدما
الايتام الجياع من الخبز تشبع
لان ماتطعم اللكمة بمقابل صوت
ماتنطيهه مرة ومرة لاتجزع
على ماجان الك يد بتجارة ومال
علي عن كل هذني من الذكر ترفع
علي ماخصصت لاجل الدعاية اموال
ماوصيت قنبر بالورق يدفع
علي اعذرني علي بس للسؤال اسباب
علي بره العراق اتملكت مصنع ؟؟
تجل لوهيجي مااعرضت عن كفار
ولاوية ابن عمك بالامر تصدع
علي يم سيفك اتنشز سيوف الغير
ويبين الطافي من الصدك يلمع
علي كون الشعر مووحي بكيفي ايصير
جاكل القصايد بس الك تطلع
وجاماكتب قلمي بغير حبك بيت
الى ان احرف اسمك بالقلم تطبع
علي لومالكينه ورق نكتب بي ؟؟
علي نلكه البديل من الجلد نشلع
علي كون القصيدة الالك بيهه ابيات
علكد مابليلك تسجد وتركع
وكون ايزخ صور غيم الخيال وياي
الى ان كل ورقتي من الشعر تنكع
وماحط بيت بيهه سد فراغ ايصير
الما ماخذ مكانه من السهل يطلع
علي ليك القصيدة غيره بيهه تكون
بس انكلهه بسمك علقلم تفزع
تسمعهه المنصه وتنحني منتشوف
علي بيهه احتراما والخشب يخشع
تتمسى قصيدة لو فقط بس بيت
ماينقصهه تكمل لو بقت مقطع
ماتخضع نقد تملك حصانه شلون
علي موجود بيهه وللنقد تخضع ؟؟
لو يدري علي بيهه غلط موجود
جامن البداية ماقبــــــــــــــل تطلع

ايهاب المالكي

[المستشاره]

روعة
مشكور اخي الفاضل ابن الاهوار
وفقكم الله ورعاك وحماكم باسمه من كل شر

[ابن الاهوار]

اشكرك لدعائك ولمرورك اختي المستشارة تحياتي لك

[ضيف]

الأخ الكريم ابن الاهوار نقل رائع ومميز لشاعر له إمكانية فريدة وحرفة خاصة في التعامل مع النص الشعري
بارك الله فيك ... تقبل دعائي ومروري

[ام حيدر]

[ابن الاهوار]

العتابي وام حيدر اخواني في الله اشكركم الشكر الجزيل لمروركم الكريم تحياتي لكم من القلب الى القلب