عتاب مع الفرات...للمرحوم الشاعر رحيم المالكي..

[احمد الخفاجي]

عتاب مع الفرات
للشاعر المرحوم رحيم المالكي
شلون تجري ومايك أزرگ يافرات
وانت ذنبك مو ذنب يفطر سمة
تسابگت بالطف اعلى حسين السيوف
ومايك اول سهم بصدرة ارتمه
طاح ابو السجاد يم جرفك شهيد
إبِّين سيفين العِدا وسيف الظمأ
وچان سيفك احد من كل السيوف
اثر على حسين حيل وألمه
بس بنات المصطفى حر الچبود
حسين حر وهاي للحر تلچمة
لكن انت تريد تذنب يافرات
وهاي ما تحتاج شرح وترجمة
تدري مايك لو وصل يم الخيام
چان روى العباس منهم صارمة
وچان ماردت رؤوس اعلى الرگاب
و چان ردت خيلهم تگطر دمة
شلون يمك مات عطشان الحسين
وما ركض مايك يم جدمة وأرتمه
طاعت اسماعيل صحراء الحجاز
وانت شح مايك لابن حامي الحمه
ذاك ابن واحد سال ربة الجليل
كيف تحيي الموتى وترد قائمة
وهذا ابن حيدر علي سيف الرسول
الما يهاب بدينة لومة لائمة
الگال لو يكشف عينة الغطاء
ما يزيد اليقين الفاهمة
يافرات وتجري بعدك يافرات
المايشوف الحق عسى بعينة العمى
گوم طم روحك حدر گبر الحسين
واعتذر لله واطلب مرحمة
گوم وغسل مايك برمل الحسين
وخلي مايك يا نهر يتيممة
ضحى باخر قطرة من دمه الشريف
وظلت اخر قطرة ثورة قائمة
حسين صافي واصفى من ماي الجنان
وانت مايك طين وجرفك طمة
حسين نبع الجود وانت اسمك نهر
ويانهر للمنبع انطة وكرمة
حسين لو منك شرب چان ارتويت
وچان اتشرف مايك ايلامس فمه
لكن انت حظ اعماك وانتهيت
وسوء حظك رادلك هالخاتمة

[المستشاره]

يا نفس من بعد الحسين هوني
مشكور اخي الفاضل كلمات رائعة
نشكر اناملكم
بانتظار مزيدكم

[احمد الخفاجي]

اتشرف بمرورك اختي المستشارة وشكرا الزيارة المباركة لصفحتي المتواضعة وادامك الله بحفظه

[وهاب شريف]

من الروائع التي اشتهرت على السنة الموالين
وفقكم الله

[ضيف]

هذا النص احد اهم النصوص التي استنطقت الجماد
إذ تحدث الشاعر هنا مع وعلى لسان الفرات
كما فعل شاعر قصيدة الميمون من قبله
وهو فن استنطاق الجماد والحيوان
إذ يشكل فيه الشاعر مفارقة رائعة تحسب له وللنص الشعري
تقديري اخي ودعائي

[احمد الخفاجي]

شرفني مرورك اخي واستاذي الشاعر وهاب شريف وشكرا على زيارتك صفحتي المتواضعة..

[احمد الخفاجي]

نورت صفحتي بمرورك المبارك اخي العتابي فشكرا لك على توجدك دوما معنا...

[ابن الاهوار]

بارك الله فيك لنقلك هذه القصيدة الرائعة التي كنا ولا زلنا نسمعها رحمة الله على روح رحيم المالكي تقبل مروري اخي بارك الله فيك

[احمد الخفاجي]

جزيل الشكر اخي ابن الاهوار على مرورك الرائع ووفقك الله ورعاك وادامك بحفظة..

[حاتم المياحي]

رحمت الله على من ساهم بهذه الكلمات الجميله