تويت
احترم كل الشعر معنه وحروف ------------- واحترم كالمن وزن نضم الشعر
لكن سوالف الي وشاعر أصيل -------------- أرد اكَله الهل العتب غظ النضر
ليش تعتب عالفرات وهوه ماي --------- وهوه من عذبه ارتشف حتى الصبر
الذنب مو ذنب الفرات ولا بديه --------------- الذنب ذنب الي يعد نفسه بشر
خله شرب الماي حسره اعلى الرضيع------ وخله سهمه بنحر عبد الله انسمر
ولزم سيفه وكَام يردف على حسين----------- وفوكَ صدره الكَعد ويحز النحر
والله جاري الماي يوم الطف بريئ ------------- ولا يزال اليومنا بحيره النهر
من ضريح حسين يتلاطم دموع ------------- الحد ابو فاضل يحيط اعلى الكَبر
ولا تزال الهذا يوم الله اليزيد ------------------ ناس تتنفس اله انفاس الشمر
لا تزال المعركه بأرض الطفوف -------------- لأن فوكَ العلكَمي يضوي الكَمر
راد زينب من تجي الوادم تشوف ------------- ابد ما مسلوب من عدها الخدر
ولا تكلف نفسك بوصف الكفيل ----------------- لأن تحتاج البعد طول البصر
هوه عباس الوصف عنه شيكَول ---------------- يا قلم يكتب صفاته ويا حبر
لأن بس عباس لومر بالضمير --------------- بهالحروف الاربعه يهيج البحر
والقوافي بموجها اللاطم تضيع---------- ولا وزن يبقى وتشيله اعلى الصدر
بالأخوه توصفه وياهو المثيل ------------------ يعرض بفكرك مثل هذا الأغر
صح امير المؤمنين ويه الرسول ------------- من وجد مثله علي بطول الدهر
لكن ارجع يم ابو فاضل تشوف ------------- تلكَه عباس وعلي بنفس الصور
ومثل ما كرب النبي يكشفه علي ------------ تلكَه كرب حسين بعضيده اندحر
حسين واحد لكن بعباس صار--------------- ضرب واحد فارق يساوي العمر
والدليل يطيح عباس ويصيح --------------- حسين ياخويه انكسر مني الضهر
ابو حسن الحسيني
تعليق