تويت
حنـــــــــــين الــــــــــــروح..
تحن روحي عليك إشما زمن طال ...إلك ظلّت يبـــويه بگلبي لچــمات
وتـــهل عيني دمع من يمر طاريك... وتخنــگني بغيابك بويه عبـــرات
أحاول أصطبر والصبر ميفيد... يهزني الشــوگ گــــــوه وأذكر الفات
تساهر عيني كل ليلة أعلى طرواك ... اويلي أعلى الليالي أشكثر مرات
تذكرني الليالي بگعدتي وياك ... وياخــــذني الحنين اعليك ساعـــــات
واهيم ابحر حزني وگلبي ملهوف ... وتسلي الروح حسرة ونوبة ونات
واذكر من تخلّي إيدك على الجروح .. تطيب وما يظل بالجرح لچمات
وأنــــام وأستـــــــراح وانت متنام ... وتساهر من تهيس بيه وجعـــــات
لگيتك بالشدايد ترد كل ضيم... إلك ويــــــاي يابو جــــواد وگفـــــــات
چثيرات السوالـــــــف لون عديت... كلـــهن من أعــدهن والله زينـــات
غفل باگك زماني بوحـــشة الليل ... ورحت عني بعد ما ترد هيهـــــات
ولون يرضى الزمان أفديلك الروح ... وترد ليّه واجرّ عليك حسرات
وأشمّك شمّة العاشگ يبو جواد... وأحطّ خدي على خدك ولو لحظات
يا سلــــوة الــروح وشمعــة البيت... عشرتك حلوة كلش طيب الــذات
لچن ظلمة بغيابك صارت الدار... چنت بيها شمس وتضوي ساحـات
وبيه النار تسري وتحرگ الروح... لو شامت سألني وگتله ابوي المات
ولچن شنهو القصيدة وتلم شوگي اعليك... أبدن ما تلم الشوگ چلمات
بقلــــــــــم ........السهــــــــــــــــــــــلاني
تعليق