بين العباس والحوراء زينب

[عبدٌ لفاطمة]

ابا الفضل
انه العباس اجيت اليوم اقبل منج الجفين
وتوادع يخيتي وياج كبل لا اغمض العينين
طالع للمعارة اليوم ماضني ارد لحسين
بس اوصيج يا زينب بحك العلي لا تبجين

الحوراء زينب
سالم يا كمر هاشم يخوية لا تودعني
اضنك لو تموت اليوم اموتن وانته تدفني
روح بروح يا عباس بس تبعد تألمني
وشنو العذر يا عباس خواتك لو ينشدني

ابا الفضل
عزيزة يختي يا زينب حكج يا عقيلتنه
وخواتي لو ينشدنج كولي راح كافلنه
لا يرتفع صوت النوح بس تبجن تأذنه
وانتي ادرى يا زينب وتشوفين حالتنه

الحوراء زينب
حالتكم يماي العين حالة امي الزهره
من دفعوا عله الباب طاحت ميته علغبره
ومثل حيدر علي الكرار مات ومنكسر ظهره
ولو تبعد يبو فاضل لصب ادموم بالعبره

ابا الفضل
دمي انطيج يا زينب بس لا تجري دمعاتج
ولكر اعيون فاطم بيج واكلهم هذي ترباتج
واهز الغاضرية اليوم خله تشوف راياتج
واجيب الماي يم رجليك خله تروح حسراتج

الحوراء زينب
أي .. من دمك يبو فاضل لشد احزام لونه احمر
واطوفن بين اديك اليوم وانادي فاطمة تحضر
وبين المشرعة وجودك نجيك نهمنه نتعثر
ويجبك المصطفى المسموم وما ينساك اضن حيدر

ابا الفضل
بوكفاتي يزينب هاي لروي كل طفل ضامي
ما همي يخيتي بهاي لو تتكسر اعضامي
فدوة يروحلج عباس ودمه ايصير الج حامي
واجيج ازحوف يا زينب وكلبي يمشي جدامي

الحوراء زينب
كفو والنعم منك فارس وضرغام
فديتك اغلى ما عندي وريت بمهجتي الالم
كوم وياي يا عباس خلنه نودع الايتام
لو جاهم خبر فكدك بعدك تسود الايام

ابا الفضل
انه طير وكسير اجناج من انظر على الرضع
واشوف اجبود عطشانه من هلحال شتوقع
نذرت الحبهم انه الروح لو جفيني تتكطع
وخله تجور هلايام لون كل جسمي يتبضع

الحوراء زينب
صرت هاجر انه بصبري بين العلكمي واحسين
طفن عيناي يا خوية كبل لا شوف سهم العين
رحت انحب لبو السجاد لكيت ادموعه علخدين
وين اطلع يبو فاضل دليني الشريعة وين

ابا الفضل
دربي بعيد يا زينب لا يا خيتي لاتكربين
ساعة موتي اضن حانت ما اكدر اجيج الحين
ومتعرفيني يا زينب عكب سهم السكن بالعين
بس اوصيج يا خوية امانه تقبليلي احسين

الحوراء زينب
ويريت انه اصبحت جفين اصيرن بين ادينك جف
واجيبن بين اديك الماي اروي اخر طفل وانشف
وحكك بيه تسعر نار من هليوم يوم الطف
ما تبرد ابد ناري الا ابكترك انه ازحف

ابا الفضل
السهم بالعين وجفوفي تطيح
وجودي علشاطي وكع يمي طريح
جفوفي طاحن من شفت طفله تصيح
وجن سكن كلبي وطحت ميت ذبيح

الحوراء زينب
عكبك انه افرشت روحي ويه التراب
صرت بس انثر دمع فوك الخضاب
دمعه دمعه بسدك انه بهل العذاب
وشنهو حالك يا كمرنه بهل المصاب

ابا الفضل
انه مذبوح اعلشاطي العاشكين
وفدوه ايدي وفدوه راسي للحسين
ولو الف طعنه انطعن لا ما الين
انتي رايتنه التضل طول السنين

الحوراء زينب
انه صرت اجرع الم من الطفوف
من لكيتك بس جسد وبلا جفوف
صرت بس دمعه اعلجفينك اطوف
وصرت فوكك بلكي اصد طعن السيوف

الحوراء زينب
خوية طفت نار الموزمة وحل السكون
وبس جثث علكاع لتشوف العيون
هذا الاكبر هذا قاسم هذا عون
وسوط خصمك يضرب بهاي الضعون

[آمال يوسف]

ـآللهم صلِ على محمد وآل محمد
أقف هنا لك إحتراماً وتقديراً على هذا ـآلذوق والإبداع
كلمـــآت جميلة منسوجه ومتذوقهـ بصفوة نفسك
يشرفني أن أكون ممن زرع ـأحرفهـ هاهنا أمام ذآئقتك
فأنثرها ـإعجـــآباَ وتقديراَ لما إختاره قلمك

مررت من هنا فزرعت أحرفي ..
ماننحرم من جديدك
ـأطوـآق ـآلياسمين أهديهآ لجمــــآل ذآئقتك ..

[عبدٌ لفاطمة]

والله اختي أمال خجلتيني وانا ما استحق مثل هذا الثناء
انا خادم صغير لخدام ابا الفضل العباس ارجو دعائكم اختي الفاضلة

[شمس الكفيل]

السلام عليك يامولاي ابا الفضل والسلام عليك يامولاتي زينب

[السهلاني]

يـــعباس بغيــــابك هـــامـــت الــروح ..

كصـــدت للشريــعة وشبـــكت إعليـــك ..

تشكيلك هضم لوعــــة وحـــزن وهمـــوم ..

وتـــسألك ياكمــــر شنهـــو اللي مــاذيك ..

شـــوف الـــصار بيـــــنا إهـــنا يعـــباس ..

إكــــــــــــــعد يلكفلـــت إخــتك تنـــــاديك ..

لكم مني خالص الدعاء راجياً قبول ما خطّــه قلمي ...... السهـــلانـــي

[عبدٌ لفاطمة]

احسنت اخي السهلاني ماجور ان شاء الله كلمات رائعة