تويت
قصيــــــــــــده عظيمـــــــه بحق فاطمة الزهراء روحي فداها
بقـــــــــلم الشاعر مرتضى الذهبـــاوي
اذا اكتب قصيدة لفاطمة الزهراء
لازم قطن يمي وهيجي ما اكدر
لان كلما اخطن فاطمة الزهراء
من كل الحروف يسيل دم احمر
وتفيض القصيدة وعيني هم تفيض
وتالي القصيدة وانا نتدمر
ولان بعيوني كاتب فاطمة الزهراء
اشوفن من اغمض وابد ما اعثر
وعلي نايم جنت لمن بديت بهاي
وجن واحد ندهني يكللي كوم اسهر
كوم اكتب قصيدة لفاطمة الزهراء
وحقوق الطبع محفوظة الك بالمحشر
تعال اكعد وياي بساحة التاليف
ولتباوع علي باوع على الدفتر
تلكه الورق يلطم والقلم رادود
وايدي على الصدر وحدهه تتشمر
وكمت ما ادفع الباب من اطب البيت
اخاف بدفعتي ضلع امي يتكسر
كمت اعبر الحايط ما افك الباب
لو قافل البيت ومن وراه افتر
قضية فاطمة مو سهلة بالتاليف
ولا بينه عجز ونريد نتعذر
لان اسرار بيهه ومن ضمن الاسرار
صارت من محمد للوصي معبر
النبوة والامامة التقن بالزهراء
يعني الدفعة صارت بالنبي وحيدر
ولان بس حيدر الشاف الضلع مكسور
اذن عندي السبب ليش انقلع خيبر
لان دفعوا عليهه الباب شال الباب
ثأرا للضلع طب الهم العسكر
ولان دفعوا الباب ثلاثة عالزهراء
عزاهه بسنة ثلاث مرات يتكرر
بغضا بالثلاثة الباري جنه يكول
كلمن يوم اله وينسب على المنبر
رقم ثلاثة رمز لفاطمة الزهراء
ما احجي اعتباطا راجع المصدر
اصحاب الكساء ثالثهم الزهراء
والدفعوا الباب ثلاثة مو اكثر
ووفاة الزهرة مخفية بثلاث ايام
والقدر بثلاثة ايام تتقدر
اذن فاطمة ليلة قدر بالاثبات
اذن سورة القدر بحقهه تتفسر
ومو بس هاي ازيدك في شهر رمضان
بالعشرة الاخيرة الحال يتغير
لان لمن اصومه باول العشرين
اشرب ماي عادي من اجي اتسحر
ولان فاطمة القدر وكوثر المختار
بالعشرة الاخيرة اشرب من الكوثر
تعليق