تويت
قصيدةفي رثاء العباس (ع)
ساعد الله احسين من شاف العضيد طاح واجفوفه اصبحت مكطـــوعـــة
--------------------
ساعد الله احســين حــين الودعـــه يشبــك العبــاس وايهـــل مـدمعـــه
اشلـون حاله ابيوم شاهـد مصرعـه او طاحت الرايه الكبــل مـرفوعــه
----------------
ساعد الله احسين من شاف الفــزع مـن لفـه العباس والــدرب انكطـــع
اشلـــون حاله ساعـت البيهـا وكــع اوصيحته عنده اصبحت مسموعــه
----------------
من سمع صوته ابعجل ليه اعتنـــه هلن ادموعه اوعليه عــزمه انثنــــه
صاح ياخويه الظهر مني انحنــــه والكلب ضاك ابغيابــك لوعـــــــــه
----------------
خويه يا عباس ذخـري الشدتـــــي غبت عن عيني اوعفتني ابوحدتـي
ياهو من بعدك يجاوب نخـوتــــي والفــزع كلمــا كثـــر ميــروعـــــه
----------------
خويـه يا عباس يا راعـي الوفـــه يالحويت الكل فضل والكل صفــه
ما أظن يحصل لعد جرحك شفــه ياللي نفسك عالفضل مطبوعــــــه
----------------
خويه ياعباس شاهــد غربتــــــــي عكب عينك يخي كلت حيلتــــــــــي
ذابت ابشوفت اصوابك مهجتــــي حسره ظلت بالكلب مـزروعـــــــــه
----------------
خويه كلي اشلـون للبيـرغ تعـوف خوية جاوبني اصبحت وين الجفوف
خويه ريت الموت راواني الحتوف اوعيشتي اخلافك غـــدت ممنوعــــــه
----------------
كلــي يمشكـــــر شجــاوب مـــن أرد للخيــم واختــك تبــادلنــي النشــــــــد
شنهي أكول الراس مفضوخ ابعمد !! والجفـــــوف امـن الزنـد منزوعــــه
-----------------
فارس العبادي
تعليق