علي بحر العلم ما تنتهي اسراره...قصيدة بمناسبة يوم الغدير

[ابوسجادالمنصور]

يوم الغدير الاغر
2011
توجهت بطلب حاجة للامام الحجة عجل الله فرجه فمدحت جده امير المؤمنين عليه السلام
وفي الليله الثانية وقبل القائها بشرني شخص بالمنام بان الامام الحجة يقول اخبر ابو سجاد بان حاجته قضيت
تبدأ بثلاث هوسات
وتنتهي بشطر هوسة
&&&
علي مثل الشمس ووضح
علي من يحجي يحجي الصح
وعلي كل يوم من عدوانه يجرح
صامد حيدر..... رغم الضيم النازل بيه
***
علي باب الكرم والكرم بنيانه
علي علة الحك وتاج الراس عنوانه
وتعودنة الكرم من جاهه وبشانه
صح نتكيرم...... لكن حبك ما ننطيه
***
مو آدم كبل حيدر اجزم حيدر الاقدم
علي بنص الكلب محفور ومبرجم
علي ما حبه واحد من صدك فد يوم وتندم
لا تتنازل عن حب حيدر..... ابقة مجلب بيه


************
القصيدة


علي بحر العلم ما تنتهي اسراره
وعلي فوك المحب مدلية استاره
وعلي جنة وتسجل اسمه بالفردوس
وبالقرآن و بآيات الله موثقة اخباره
وعلي نار الحطيم الشاب من زمان
وليكره علي لازم يطب ناره
علي جبريل جان يهز مهد ابنه
وزغب جبريل مالي البيت واكتاره
وعلي كهف الحصين النايبات البين
تقر عينك اذا تدفه بادثاره
علي باب الحوايج من تجي وتنخاه
واذا ما تنكضي الحاجة ترد وبايدك بشارة
علي فلاح يزرع والزرع مضبوط
وسكه بدم الشهيد وخضرت اثماره
وسكه زرعه بضلع ام الحسن وحسين
من كسروا ضلعهه وصارت الغاره
وسكاه بستر زينب يوم حيرتهه
وبنحر الرضيح وطيحت احراره
علي مو جن ضعيف انصاب بالمحراب
لكن امر الله وهذي اقداره
علي سبع الحرب ويحك نزامط بيه
انشد حصن خيبر وانشد اسواره
وانشد منهو كام العمر يوم يصيح
وعار عله السكت ما يمحي عاره
علي صاحب مصيبة ونايبة بكل يوم
ما يرتاح لمن ينوخذ ثاره
اطلع سيدي ولا تنتظر نلتم
تفركنه وكتب كل واحد اعذاره
........
آنه مدحت جدك حيدر الكرار
و الشاعر اذا يمدح اله بشاره
انه بضيجة واريد الفرج من يمك
وي هالليل وكبل ما يطلع نهاره
خلص صبري وبعد ما تحمل التاجيل
والتاجيل انت التعرف اضراره
نخيتك من بعيد وما بيه حيل الفيك
وتعرفون المحب وشتقره افكاره
طرية النفس يامولاي وانت ادره
لو ما رحمة الباري النفس بالسوء اماره
انه بشباج امك علكت روحي
وخلص هذا العمر بكباره زغاره
ذنوب مجلجلة وهموم كد الكون
وبغيرك ابد ما شوف الي جاره
شكول واعتذر وجدك قسيم اهناك
وبيا كوثر اطالب وانتوا عماره
اسالك بالحسين وبكل بنات حسين
واسالك بالعطش وبتراب زواره
واسالك بالمشوا لحسين ويخدمون
وبضيم المشه وبدمعه وغبارة
وبحق ام البنين الشككت لجيوب
من عرفت احوال حسين واخباره
وبحق ام البنين الراح منهه الحيد
وونت عالبطل ويمينه ويساره
واريد انخاك بجاه الفرت من النار
وبجاه الثوب و النار الي بكتاره
عزيزة وما اظن تبخل علي مولاي
اريدن كبل ما اطلع الي بشاره
اريدن كبل ما اطلع الي بشاره
ها.....ها....
طلبنه الحاجة.....وانت بجاهك تكضيهه...
طلبنه الحاجة وانت بجاهك تكضيهه
ابو سجاد المنصور
(عبد الصمد جاسب خضير)
بصرة – الفاو
2011
رجاءا لا تنسونه بالدعاء

[خليل علي الزبيدي]

قصيده من الذهب تسلم يبو سجاد بســــــــــــــــــتان وتغرد بيه أطياره
فاحت ريحة القداح من كل صوب ونشر عطر الولايه وضحكت ازهاره
ادعي لك يحضــرك حيدر الكرار ويشمـــــلك صاحــــب الازمان بانواره
ماخاب التمـــــــــــــسك بالوصي الكرار وفاز الذكر اسم حسين باشعاره

بارك الله بك نور عيني ابوسجاد واسجد الله لك القوافي لخدمة مواليك .

[ابوسجادالمنصور]

قصيده من الذهب تسلم يبو سجاد بســــــــــــــــــتان وتغرد بيه أطياره
فاحت ريحة القداح من كل صوب ونشر عطر الولايه وضحكت ازهاره
ادعي لك يحضــرك حيدر الكرار ويشمـــــلك صاحــــب الازمان بانواره
ماخاب التمـــــــــــــسك بالوصي الكرار وفاز الذكر اسم حسين باشعاره

بارك الله بك نور عيني ابوسجاد واسجد الله لك القوافي لخدمة مواليك .

الله يبارك فيك يا أبو آمنه
ومشكور على الابيات الاضافية
نسالك الدعاء دوما
تحياتي وتقديري

[الطريق الى كربلاء]

بارك الله اليد التي خطت حروف القصيدة ورسمت هذا الشكل الشيق في حق الإمام علي بن ابي طالب عليه السلام جعلها الله في ميزان اعمالكم

[ابوسجادالمنصور]

بارك الله اليد التي خطت حروف القصيدة ورسمت هذا الشكل الشيق في حق الإمام علي بن ابي طالب عليه السلام جعلها الله في ميزان اعمالكم

شكرا لمرورك
ودعائك
رزقكم الله شفاعة امير المؤمنين عليه السلام