من هو الحسيني الحقيقي

[الشاعر الغريب]

بسم الله الرحمن الرحيم

اللهم صل على محمد وال محمد اولي الامر الذين فرضت علينا طاعتهم

قصيدتي بعنوان من هوالحسيني الحقيقي واسالكم الدعـــــــــــــــــــاء

ــــــــــــــــــــــــــــــــــــــــــــ

يسمونه حسيني وشاعراهل البيت***شاعرنه اليصوغ اوزانه بالعبره

ويسمونه حسيني وخادم اهل البيت***رادود الـــــقصيده لو قره بحسره

ويسمونه حسيني وتابع اهل البيت***كل واحـــــد ينوح ولو لطم صدره

وميلوك اللقب بس للخدم باخلاص***وخلص كــل حياته بخدمة العتره


الحسيني من صدك مسلم سفير حسين***كريم وبالشجاعه العالم يذكره

الحسيني من صدك عباس ابو الكلفات***بحب حسين ابد ما همته الكثره

وماهاب الجيوش ولا يهاب الاف***من حيدر اخـــــــذ عباس هالشمره

لجل دينه وامامه ضحه بالاخوان*** اوهب دمه وحياته ويمنته وبسره

الحسيني من صدك عابس حبيب حسين***حب حسين جنه وقدمه العمره

الحسيني من صدك اصحاب ابو الاحرار***صارو للنبي انصار والزهره

ضحو بالدمه وقدمو اعز ارواح*** وكتبو للـــــــــبشر درس والف عبره

الحسيني من صدك كلمن نصر الحسين***ويظل حسين ينصر كلمن ينصره

وحسيني اللي يصير حسين أله عنوان***بمنهاجه يــــــسير ويقتدي بأمره

وحسيني اللي اخذ من كربله العبرات***وذكر حسين يسري بروحه وبفكره

وحسيني اللي حضر مجلس لابو السجاد***يحضره بكل صدق واخلاص وبفطره

وحسيني اللي خفض جنحانه للربوه***جنح أيصير في الهـــــــم جنح كمره

وحسيني الما يبيع أصحابه وكت الضيج***يصير الهم غطه لو بنيت عوره

وحسيني اللي يتفانه بخدمه الاطهار***سمعه مايريد ولا يحب شهره

وحسيني اللي وهب حب الجميع الناس***وباعماله وسلوكه الوادم تذكره

وحسيني اللي رضع طيبه وكرامه وزود***من صدر العقيده الصادقه الحره

وحسيني اللي حزن لمصاب أهل البيت***وكل مجلس يصير يصونه ويحضره

وحسيني الماتهزه الريح والصدمات***ولوجار الزمان ولوح بـــــــــــــشره

وحسيني اللي يمد ايده بكرم للغير***ولوطـــــــاح الصديق ايشيله ويعبره

وحسيني المارفع صوته اعله صوت الحق***جي من الحسين الحق بزغ فجره

وحسيني الماتخوفه أهل الذبح وارهاب*** جبل عالي بشموخه محد يكسره

وحسيني لالي نكر اهل البدع والجور*** وعدوان العقيده منهم اتـــــبره

وحسيني المايخون احوانه والوافوه *** يصير الهم جسر لو طكت العبره

وحسيني هالقلم لو ما يدور جاه *** وذكر حسين دوم بمنطقه يسطره

وحسيني هاللقب تاج وفخر للناس*** وصعب هذا اللقب لو رايد اتفسره

وكل واحد حسيني يصير باخلاق **** ومن حزنه تعرفه ومن حجم صبره

وشاعرنه يحصل عاللقب لو راد*** بس لحـــسين يكتب يخدمه بــــــشعره

وميسموه حسيني وشاعر اهل البيت***اليوم اهنا وباجر عنده جم سهره

واذا انته حسيني لقبتك هالناس*** عمرك هاذ للوادم تره اتـــــــــنذره

ولو رايد تصول وتنكلب بركان *** بس حب الحسين يفـــــجر الثوره

[عطر الكفيل]

الله يحفظ كل خدام الحسين

سلمت اناملك الولائيه على روعه الانتقاء

[علي حسين الخباز]

الشاعر الغريب القريب جدا من الروح لك مودتنا ودعواتنا بالخير والموفقية والشفاعة الحسينية والدعاء

[الشاعر الغريب]

اخوتي الموالين

عطر الكفيل

وعلي حسين الخباز

ادعو من الله تعالى ان يوفقكما لما فيه الخير

واشكركماعلى مشاعركما الطيبه واهدي لكما هذه الابوذيه

وعينــــــــــــــه

على حب الحسين احنه وعيـــنه

بمحبته اصغار بس كامل وعينه

اضحي المذهبي بروحي وعينــه

حسيني ومن علي عندي هويـــه

ملاحظه = توجد بعض الاخطاء المطبعيه في القصيده ولا استطيع تعديلها
فارجوالمعذره