امـــــــــــــي الحنينــــه

[الشاعر الغريب]

بسم الله الرحمن الرحيم

اللهم صل على محمد وال محمد ووفقنا لخدمتهم

هذه القصيدة من القصائد المفتوحة وهي من البحر اطويل

وقد اسميتها اشكد طيبه وحنينه امي

من اشم عطر الورد ارتاح ** لان عطر الورد يشبه عطر امي

من دمهه انوجد دمي ** وبالــــــــحب والحنان اتزيح كل همي
اشكد طيبه وحنينه امي

زهره امي بعطر قداح *** اسمهه من البــتول وفاح

تحت اقدامهه الجنه *** تنكط غيره وامــــــــــحنه

سمتني عبد لحسين *** اني اوياهه منذوريــــــن

عالفطره تعيش امي *** اشكد طيبه وحنينه امي

سهرت هاليالي اطوال *** وصارتلي نغــــــم موال

حبهه جن عطر ريحان *** ماظن توصفه الاوزان

تهفيلي برموش العين *** تلولي بنشيد حـــــــسين

فقيره ونادره امي **** اشكـــــد طيبه وحنينه امي

امر الرضعتني الطيب ** جروحي وي ذكرهه اطيب

عشت اوياهه احله ايام *** ولجلي اتحمــــلت الام

تحزن لو يهل دمعي ** تشور امي من تـــــــــدعي

لان كلش عفيفه امي **** اشكد طيبه وحنينه امي

فرشتلي طريقي اورود *** بما تملك عليه اجود

تغفه بساعة الاغفه ** وربتني علــــــــــى العفه

بحبهه الظلمه تضويلي *** ليل انهار تــــــــدعيلي

تدعي بالكلب امي **** اشكد طيبه وحنينه امي

جانت عيشتي انظيفه *** رغم حالتنه الاضعـــيفه

حنان العدهه اصبح تاج *** ماخلتني ابد محتاج

تلح دوم وتكلي اقره *** اريدن بيـــــــك مفتخره

امي المدرسه امي **** اشكـــــد طيبه وحنينه امي

شما اكبر اظل اصغير *** ومن اطلـــع تلوب اتحير

عني تسال الاصحاب *** وتبــــــقه تنتظر عالباب

اشعر كلبي يوجعني ** لان ادريــــــــــهه تنطرني

مااكدر اجازي امي **** اشكد طيبه وحنينه امي

امي فلسفله واعراف *** نسبهه بيه جثيره اشراف

امي ام عراقيه *** فراته ودجلـــــــــــــــــــته هيه

هيه اجبالنه والهور ** امي الكاع والناعــــــــــــور

ما انسه ابد امي *** اشكد طيبه وحنينه امـــي

مااجمل معانيهه *** ريحـــــــــــــــة كل هلي بيهه

تشبه روج المشرح *** تطير بــــــشوك لو افرح

بوجهه الكه الابشاره *** طيبه امـــي من العماره

اصيله من الجنوب امي **** اشكد طيبه وحنينه امي

جن ايحاء عدهه امي *** بيوم اختارته الاســـــــــــــمي

صرت اكتب شعر لحسين *** واخدمه بالكلب والعيـــن

وادعي يغفر الباري *** الزهره بت حســـــــــن جاري

بعطفه يلتفت لامي **** اشكد طيبه وحنينــــه امي

******************************

الله يرحم امواتكم جميعا ويجازيهم بالاحسان احسانا
وبالسيئات غفرانا

[كرم الزهراء]

الشاعر الغريب
يعطيكِ العآفيه صفحة أنصهر الحرف من روعتها
وذابت الكلمات من جمالها ..
فشكرا جزيلا لك
لاعدمنـآ هذا التميز والتألق..
بإنتظآرجديدك بكل شوق..

[الشاعر الغريب]

الأخت الموالـيه كرم الزهراء

شكرا على هذه العبارات العطره وشكرا على مرورك الكريم *** واقول

اسمج كرم زهراء بيه جم دلالــــــــه

شاهد على الظلام واهل الظلالـــــه

[نداء الكفيل]

تسلم الايادي بالتوفيق

[السهلاني]

امي بغير شخصج دنيتي شتسوه ...
امي يا نبع الحنان المنه اتروه ...
امي يا بلسم اجروح انروحلج فدوة ..
امي يا لحن الحياة الكل حزن سلوة ..
امي هيبة .. امي طيبة ..
شكد عظيمة امي ..

لستُ شاعراً راجياً من اخي الغريب قبول ما خطه قلمي

[الشاعر الغريب]

الاخ السهلاني

ارحب بمرورك *** كلمات رائعه

واقول

راضــــــــي بكلامك زين وبكــلمة امي

هالكلمه صارت دوم تمشي اويه اسمي