من عمري عله عمرچ يمه الچ محتاج
طفل يصرخ ينادي وامة مجروحه
طاحت بنفجار وماعرف شنهو الصار
طاير بالسمه حسباله مرجوحة
وگـع علـگـاع صافن ماسمعها اتصيح
اسم الله ييمة ويسأل بروحه
وين امي وليش سكتت شنهو صار ؟
ومن عاين لـگـاها بجنبة مطروحة
عاجز عضمة ليّن والرضوض هواي
ودمعاته عله خده تجري مفضوحه
عايف دمعته ومنتظر امه اتـگـوم
متعود يحس الدمعة ممسوحة
يمه شلي غيرچ منهو يمي ينام
يعني بليلي تبقى العين مفتوحه ؟
يمه تسمعيني ؟ والتمت عليه الناس
شالو بس جسد يمها بقت روحه
ويـگل للناس
هاي امي ابد ليمسها رجال
للشرف للعفة تنعد الصرح
غير متن امي فلا اصعد عليه
هيه امي تـگوم وتضمد الجرح
أو أذا تعبانة ماتـگدر تـگوم
ابقى يمها موسد الحد الصبح
افـگس عيوني ولا لحظه انام
وجروح جسمي كلها اترسها ملح
لاتضمدو جروحي شلي بهلحياة
گلبي مو جسمي يناس المنجرح
تعليق