نحچي الصدگ

[سعد مطلوب]

(( نحچي الصدگ ))
نحچي الصدگ يولاله ... موطنه صعبه احواله
************
نحچي العدل واهل العدل خالتسمع
ليش الوطن للظُلم صـــــاير مرتع
موكلنه راح الصنم حزبــه اتوزّع
شــــوتالي بس شيعة علي التتكَطع
ردينـه نفس الحــــاله ... نحچي الصدگ يولاله
************
أطلعنه انتخبنــــــاكم ابصافي النيه
اوخلينه دمنه ينســــــــــــفح يوميه
ضنّيه ذاك الحــــــــزب مابي جيّه
چاليش رجعت تحــــــــــكم البعثيه
رد النـذل بعيـــــــاله ... نحچي الصدگ يولاله
************
ليش الوطن شــــــرّعتوا كل بيبانه
اوخليتوا فوگ اركَابنــــــه العادانه
مانـــــدري انتوا إِعلينـــه لو ويّانه
فاض الصبُـر موكافـــــي يامولانه
ساعه اويطگ زلزاله ... نحچي الصدگ يولاله
************
شــفتوا المقابر خـذت منعدنه احيود
اوبالواحد اوتسعين هم شفتوا الزود
لوما دمانـه چـــــــان عفلق موجود
وهم چان انتوا لهسّــه خارج لحدود
طوّل شــــــــعبكُم باله ... نحچي الصدگ يولاله
************
خليتوا حفنــــه انــــــذال تلعب بينه
كل ســــــــاعه واحدهم إيهد إِعلينه
والله لوچـــــــــــــــان الأمر بيدينه
نلعن ابو كل واحــــــــــــد يعادينه
ونسحله من اعگاله ... نحچي الصدگ يولاله
************
بقلم / سعد مطلوب الخفاجي

[خليل علي الزبيدي]

يحفظك علَ هلْ الابيات طه النبي واله

شعرك جميل ومهيوب وماينلـﮕـي أمثاله

بس نحمد الله عل الصار طاح الردي وتمثاله

نحچي الصدگ يولاله

[سعد مطلوب]

عزيزي الغالي
ابو امنة
اشكرمرورك الرائع واطرائك الطيب وابياتك الجميله
تمنياتي لك بالوفقيه
******
والله حچيـــك مضبـــــوط طاح الردي وتمثاله
بس خويه شفت الي صار سفحت دمانه عياله
بغداد شـــــــبوها ابنـــــــار خلوا جثثنه انخاله
من بعد كل الشــــــــفناه نحچي الصدگ يولاله

[احمد الحجي]

سبق وان ذكرت الى الاخوة الشعراء في المنتدى انا لست بشاعر ولكن اردت ان اشارككم بهذا المصاب الجلل بكلمات بسيطة
اسف لانها غير موزونة ولكم الحق بالتغيير بما ترونه مناسب

خل نحجي ياخوية الصدك شنهي البقت مضمومة
شنكول ما رد البعث وهي اصبحت مفهومة
الموجود نفس الي قبل بس بدلوله هدومه
يتفنن بقتل الشعب ويحللون ادمومه
معروفه هاي افعاله ***** نحجي الصدك يولاله

تقبلوا مروري المتواضع

[الشاعر الغريب]

مبارك لك اخي سعد

على هذا التصور الرائع

واقول

كل الجره والصار جي احنه شيعه

ومنـــــهج علي الكرار ظنهم نبيعه

تقبل مروري المتواضع

[علي حسين الخباز]

سلاما سعد وفقك الله وحفظك يا صديقي نشتاق لتواجدك دائما بيننا

[سعد مطلوب]

اخويه العزيز الغالي
احمد الحجي حبيبي الغالي طيب الله انفاسك الكريمه
والله يقوي قلمك الولائي في خدمة آل بيت محمد (ع)
ماشاء الله ابياتك في غاية الروعه وتحاكي الوقع المرير
تمنياتي لك بالموفقيه ياغالي
************
ياخويه معروف السبب كل الجره من ايدينه
من سـاعة الطاح الصنم عفنه الذي أمعادينه
ماحاسيبينه اهل البعث والي تنــــــــكل بينه
اوتيّهنه كل دم انســــــفح غضّينه عالماذينه
مسئلنه عن چتاله ... نحچي الصدگ يولاله

[سعد مطلوب]

عزيزي الغالي
الشاعر الغريب
اخويه العزيز الغالي طيب الله انفاسك على هاذا
الدارمي الذي ينم عن واقع بحت ومرير تمنياتيلك
بالموفقيه ياغالي
************
يفجرنه النذل تهديد وده ... لچم جرح الكَلب هنوب وده
وبشفرة حقد يذبحنه وده ... كل ظنـه نعوف ابن الزچيه

[سعد مطلوب]

اخويه العزيز الغالي
علي حسين الخباز
احنه الاشوق عزيزي وانا في رسم الخدمه تمنياتي
لك بالموفقيه ياطيب

[كرم الزهراء]

الشاعر سعد مطلوب
كلمات في قمة الخيااال

طرحت فابدعت

دمت ودام عطائك

ودائما بأنتظار جديدك الشيق