قصيدة كعده لزينب عليها السلام

[الشاعر الغريب]

العقيله الهاشميه الطالبيه عليها السلام



حره وابيه *** هالطالبيه

زود وعلم وايمان ** وبخدرهه عنوان

هالطالبيه

********************************

فاطمه البضعه الزجيه ** يلقبوهه أم ابوهه

وزينب اتسمت بعدهه ** بالعقيله أم اخوهه

تفتدي حسين بدماهه ** لجله توهب كل بنوهه

هاذي بت حامي الحمه * علم وفصاحه معلمه * مرشده الهه فاطمه

بعصمة السر وشحوهه

عصمه وكرامه ** تنضح شهامه

ينبع طيبه الوجدان ** وبخدرهه عنوان ** هالطالبيه

***********************

حصلت اعظم شهاده ** بفلسفه ومنطق قديره

بالخدر والعفه أيه ** وبالعزم جانت جديره

طاهره وحره وكريمه ** بثورة حسين الوزيره

هيه بأصلهه اطهر اصل * اخلاق واداب وعقل * عدهه الحجي كول وفعل

للنسه قدوه واميره

حكمة ابوهه ** وغيرة اخوهه

الهه صارن برهان ** وبخدرهه عنوان** هالطالبيه

*******************

من اجه شهر المحرم ** والضعن شد برحيله

اتسلمت امر الاداره ** للضعن صارت دليلـــه

وفوضت امر الحمايه ** للكمر يصبح كفيلـــــــه

سلمت بيديه العلم * وصته بالزود وشيم * وصاح الكلب من الالم

وكتمته الحره الاصيله

كتمت حزنهه ** ضمت شجنهه

نوح وصبر واحزان ** وبخدرهه عنوان ** هالطالبيه

************************

عاشر العشره بمحرم ** ظلت اتحوم الوديعه

طاحت الانصار كلهه ** ظلمه صارت هالوسيعه

الاكبر وجاسم تفادو ** والسبط ذبحو رضيعه

دم الدمع منهه انهمر * مهضومه من طاح الكمر * وجفوفه تحضن بالنهر

وتنعه مهمومه الشريعه

غيبة كمرهه **** كسرت ظهرهه

قدمت جم قربان * وبخدرهه عنوان * هالطالبيه

***********************

ظل ابو السجاد وحده ** وحاجته بونه خفيـــــــه

نادته بصوت المئاسي ** تكله عندي هالوصيـــه

ارد احب يحسين نحرك ** بهايه وصتني الزجيه

حبته من وسط النحر* والنور شع منه وظهر* نادت يبن سيد البشر

ياهو من بعدك اليه

بحكمه صبرهه ** بكلشي اخبرهه

بهمه اتذل العدوان ** وبخدرهه عنوان ** هالطالبيه

[بشار رحيم]

احسنتم وطيب الله انفاسك

[من نسل عبيدك احسبني ياحسين]

السلام عليكم موفق بحق آل محمد

[أنصار المذبوح]

بارك الله فيــــــــــــــــــــك
قصيدة جدااااااااااااااا حلوة ومؤثرة
حياك الله

[الشاعر الغريب]

الاخ العزيز بشار رحيم

الاخوات الفاضلات

من نسل عبيدك احسبني

وشيعه ونبقه شيعه

شكر على كرم المرور