مايوم الشمس حجبتهه عنّه اغيوم ** وظلمه ماتسد نور الفجر لو طر
ما يهتز جبل لو ريح مرت بيه ** شنهي الريح لو عده عليه ومــــر
ولا غطه الحقيقه الجور والارهاب ** ظلــــت شامخه والجور يتكتر
ماغابت شمس لمحمد الباقر ** بأركان العقيده اسمه سمى وازهر
يستاهل ابو جعفر نهل ادموع ** شعر من دم يســـتاهل ابو جعفر
اجيتك سيدي بونة كلب مجروح ** اريد اقره شعر وبمجلسك احضر
حاير بالوصف شختار الك جلمات ** كلش اعتذر لو هالشعر قصر
ياعلم الرساله الفاق كل اعلوم ** جي سر العلم من جدك المصدر
اولنه مُحمد كالهه المختار ** ومُحمد بالوسط بيه اعلن وبشر
واخرنه مُحمد ياّخذ الثارات ** يظل لاّخر زمن هالثار يتنطر
يظل لارض البقيــــــــــــــــــــع ايزيد ودنه
ونظل طول العمر خدام ودنـــــــــــــــــــــه
ييوم الفرج اقرب عاد وادنــــــــــــــــــــــــه
خل تزهي الارض بابن الزجيــــــــــــــه
انته للفاصحه والعلم عنوان ** ياحوزة علي بيهه العــــــــلم اثمر
احجي اعله العلم لو اشرح الاحزان ** شو الاثنــــــين عندك بالكلب تكبر
عمرك اربع سنين وضكت ألام ** شفـــــت اجيوش كثره أتغطي كل البر
شفت ادموع كامت تجري يوم الطف ** وحسيت العطش وسط الضعن أثر
شفت فوك الثره الاجساد مرميه ** بعينك شفته من كطعو علي الاكبر
منهو اللي ايتحمل هالمواقف ذيج ** شفت جسام بسيوف العده اتوذر
شفت عالمشرعه جف ويعانق جف ** شفت عباس راسه بالعمود أنطر
شفت عمك رضيع ودمه ظل يسيل ** نبلة حرمله كطعـــــتله هالمنحر
شفت حسين من يم الكفه مذبوح ** حوافرخيل داست صدره واتكسر
العتره ماظن شافت نفاهه
جور البين عن جدهه نفاهه
الظالم بالذبح والسم نفاهه
والباقر نفاه سم أل أميه
صبرك والعلم صارت الك نيشان ** وبنيت من العلم أطهر واعز منبر
اسست العقيده وشرعت قانون ** وظلت هالعــــــــقيده بموقفك تفخر
ظنوهه الشريعه بطحيتك تنزال ** وتضيع اسرار لو طاح الثقل الاكبر
شسع نعلك يعادل كل بني سفيان ** جي جدك مُحمــــد والنبع كوثر
مثل جدك حُسين المارضه بالذل ** خليت العده بخطــــــاهه تتعثر
تظل شيعة علي تنتطر الموعود ** بايمان وصبر واحزان تنتطر
يظل كل الامر معقود بالمهدي ** بيده يأخذ الثارات من يظهر
بيده يأخذ الثارات من يظهر
حسين منجل العكيلي
تعليق