ضگت طعم العشگ من صغري حبيت * على گلبي العشگ يفرض ولايه
من جنت برحم مر بيه طرواه * يمر طيفه بحلم مثل الروايه
ارتبطت اويه الحبيبه بنور الاحساس * تعلگ كل امل بيهه ومُنايه
من نور الحبيبه اتضوي الانجوم * شمسنه من الخجل صارت امرايه
ثوب اللي عليهه من الگمر نور** نور البالگمر مابيه وشايه
جميله وكلهه عفه وطيب واخلاق * الحسن عدهه الاهي وبيهه اّيه
صارتلي نفس وتغذي بالروح * فديت الروح ليهه من البدايه
حسادي تتدور مني زلات * عگارب تلدغ بسم الحيايه
من شع بالوطن حبي وبزغ نور * كتايب شكلو ضدي وسرايه
سموني بأسامي كثره والقاب * اشكد اخبار عني وچم دعايه
الحسد عدهم وراثه وهاذي الاحقاد * چن هاذي الامور ألهم هوايه
بسبب حبي عليّه التمت اعداء * حبي اصبح جريمه وبيه جنايه
اشگد خطو خطط صدرو بيانات * لان فوگ السطح رفرف لوايه
بميدان الرمي صرت اّني نيشان * وصارلهم طبع فن الرمايه
عنوان الحبيبه صار اخطار * قضيتي اخطر قضيه من القضايه
وكفتلي عمامي وكل اخوتي * يعرفوني بمحبتي مالي غايه
بسبب حب الحبيبه اتهجرت ناس * من تنظر عليه چن سبايه
كلفتنه العمر وانهار من دم * لجلهه الروح فدوه وهالدمايه
رغم كل الدمه وكل ذيچه الارواح * هبو عالعرب قدمو شكايه
ماملو ابد من دمنه فد يوم * مامره اسمعت كالو كفايه
كل ظنهم محبتي اتذوب وتروح * ظنو بالغدر تنزل الرايه
لجل اسم الحبيبه العمر منذور * وثبت حبهه مثل ثبتت الثايه
اّني العاهدتهه عهدي للموت * ابد ماهاب موت ولا منايه
وفي اوياهه بمحبتي وما ازل يوم * الوفه واخلاص من اسمى السجايه
نظل عنهه نذود وابد منهاب * لجلهه ارواحنه تصبح هدايه
ماترضه الحبيبه نعتدي يوم * تعلم زين سر هاذي الخفايه
ماترضه المذله وترفض العار * احنه بهالوضع عدنه درايه
لو ترضه الحبيبه انصول صولات * نخليهه الارض تنضح رزايه
تطالبنه بصبر والصبر محمود * نعفي اتريدنه انصفي النوايه
عفينه والعفو من شيمة اشراف * كل ارواحنه الهه فدايه
فرض حب الحبيبه صار عالناس * بحبهه الباري انزل بيه وصايه
حبيبتنه الولايه الاخر انفاس * هويتي بهالوكت هيه الولايه
بولاية علي كل احنه ماشين * بيهه انعرفت اسرار الهدايه
تصبح للمحب يوم الحشر سور * درعه اتصير تصبحله حمايه
نظل نمشي بدربهه ونرفع الراس * تحبهه بكل شغف عندي الخلايه
يظل عرش الوصي ساكن بالگلوب ** ويظل حبنه العلي ماله نهايه
بدايتنه اويه حيدر كلهه بالغيب ** بالارحام جانت هالبدايه
حسين منجل العكيلي
تعليق