بأي ذنب؟

[ضياء الطالقاني]

توم وجيري عالحدود مغادرين
واكَفين معبسين وضايجين
بهالاثناء سبونج بوب ادّنَه يمهم
كَالهم ها وين جنكم شالعين
عاينوه بحزن وعيون التغرغر
من العراق وطبته احنه تايبين
آخ لو شفت اللي شفناه ودريت
جان ويانه تجي ومترد سنين
كَال يحبونه الاطفال البالعراق
وجيتهم مابَقي من عدهم حزين
بجوا توم وجيري من سمعوا سبونج
وجاوبوه بوجع وبحُركَة وانين
الاطفال هنا مسلسلهم رعب
بالحقيقة مو بشاشة متابعين
يطلعون الصبح صوب المدرسة
يردّون لبيتهم مذّبحين
لو ينامون وعليهم ينهدم
بيتهم بالانفجار ومكثر المتفجرين
جينه نزرع بسمة بوجوه البريئة
لكَيناهم بالدماء مصبغين
بعد فترة توم يسال جيري عن سبونج بوب
غاب من راح العراق ومدري وين؟؟
فتحوا اخبار العراق وشاهدوه
لونه احمر شكله تعبان وحزين
ولآن هو سفنجة بالمستشفى باقي
ينشفون بجسمه دم النازفين

[من نسل عبيدك احسبني ياحسين]

ألف رحمة ونورعلى والديك قصيدة جدا رائعة

[ابوعلاء العكيلي]

جميل جدا بارك الله فيك

[نور العترة]

الله جميل جدا
احسنت نعم هذا حالنا منذ كنا صغار و للاسف هذا ماورثوه صغارنا منا
الا لعنة الله على الظالمين

[أنصار المذبوح]

أخينا الكريم
كلامات روعة جداً
كتبت فأبدعت فما أحلى ابداعاتك

[ضياء الطالقاني]

الاخوة والاخوات الكرام نورتموني بمروركم وكلماتكم الحلوة فشكرا