تويت
قارنتك علي ويه اليحكمون
ولكيتك يا علي مفرط بالأحكام
شني تحكم الدنية وعرشك بساط
وشني بجامع مقر القائد العام
وشني عود اليتيم يكضلك الباب
اليتيم يروح يسكن دار الأيتام
جا ما عادهه ولا كضلك الباب
كون بصدره قنبر ساحب أقسام
كلشي يصير مدري يفخخ البيت
تحت مهرك يجوز يحطلك ألغام
علي شعليك إذا بالشام جوعان
دشبع حزبك ونعلة أبو الشام
تكضي الليل تفتر وأنت مسؤول
السياسي الزين كون المغرب ينام
بين الناس تخطب لا يبو حسين
علي المفروض تخطب من ورة الجام
كثر نوك واطلع موكب وياك
وانشر ع الدرب رماية سهام
ناكة مضلله وتركبها ابو حسين
وعمار ابن ياسر كعدة جدام
وخل مالك الاشتر كبلك يفوت
يكطع سير كون الشارع العام
عقيل شراد منك حتى تجويه
اخيك هاذ ضمه لظهرك احزام
كبل ماكو دمج وتدمجه مولاي
علي سجله سياسي بهدم الأصنام
شعجب ولدك علي ما طلعو إيفاد
ددزهم ع البحر يكضولهم عام
دبرلهم عذر خلهم يصيفون
بحجة مشو دوره بنشر الإسلام
علي تنطي الخبز تتلثم شبيك
جا ما كشفت وجهك للإعلام
جا ما صار بينه الصار مولاي
وضل ياهو اليجي وكال اني أبو لثام
حسين منجل العكيلي
تعليق