تويت
طور غضب رب العباد ((اجت زينب تميل)) شعر ام هدى الخزاعي
--------------------------------------------------------
اجت زينب تميل ..... تون والهم ثجيل
صاحت بصوت المصيبه تبجي والمدمع سحاب
خويه يحسين ارد اسالك كلي لاتخفي الجواب
تون والهم ثجيل
----------------------------------
زينب اعله الهم توجت والدموع .... من هظمها تصيح ياخويه بخشوع
يبو اليمه اليوم مصيوبه الضلوع .... وحيدر ومحرابه والزهره التلوع
بطشت كامت تلوح .... علي كلها الجروح
من شفت يحسين اخونه تجدد الهم والمصاب
خويه يحسين ارد اسالك كلي لاتخفي الجواب
تون والهم ثجيل
----------------------------------
وكفت اكباله وتساله وكلها خوف .... خويه يحسين بكلب ذايب عطوف
تدري خويه بحالي وبعينك تشوف .... من زغر سني وانا همومي تطوف
عشت هم ومرار ..... شفت بعيوني نار
من مصاب الزهره خويه يسعر بروحي العذاب
خويه يحسين ارد اسالك كلي لاتخفي الجواب
تون والهم ثجيل
----------------------------------
خويه كلي شلون يحسين بحسن ..... شفته خويه وحيلي يبن امي ارتهن
يون ينور العين والونه بشجن ..... وصد عليه بدمعه واهات ومحن
شفت بعيونه آه ..... حزن والهم علاه
خويه كلي شلون خويه بالحسن سيد الشباب
خويه يحسين ارد اسالك كلي لاتخفي الجواب
تون والهم ثجيل
----------------------------------
هلت ادموع ابو اليمه وجرحه صاح ..... ويفرك اجفوف هظيمه وكلبه ناح
خويه زنيب كلها وبروحه الجراح ..... كل جرح يصرخ يصيح الحسن راح
يخويه الامل ضاع...... استعدي للوداع
لطمت الراس وتكله ولا جرح بجروحي طاب
خويه يحسين ارد اسالك كلي لاتخفي الجواب
تون والهم ثجيل
----------------------------------
حار بيها حسين والمدمع يسيل ..... كلها صبري وانت بت حامي الدخيل
شلون صبري تكله ونصاب الدليل.... وابن ابوي يريد عن داره يشيل
اشوفك بي تحير ..... وعلي عينك تدير
حاير ومكسور خاطر كلبك من احزانه ذاب
خويه يحسين ارد اسالك كلي لاتخفي الجواب
تون والهم ثجيل
----------------------------------
كلها خويه ودمعه بعيونه تطوف ..... هذا وعد وكلشي بالدنيا نشوف
اليوم سم وباجر ارماح وسيوف ..... ولايظل والي يزينب بالطفوف
تركبين الهزيل ..... يزينب والكفيل
عالشريعه يظل رميه وينسلب خويه الحجاب
خويه يحسين ارد اسالك كلي لاتخفي الجواب
تون والهم ثجيل
----------------------------------
ونسالكم الدعاء ..... ام هدى الخزاعي 8|12|2013 صفرالخير
حسين منجل العكيلي
تعليق