قصيدة / حزن مْصابچ للدوم
.....................................
......................
......................
مظلومه يا زهراء مظلومه
حزن مْصابچ للدوم – گبرچ مخفي وْ لليوم
مظلومه يا زهراء مظلومه
..............
يام الحسن راووچ الوان الاذيه – عدوانچ الظلّام لا غيره وْحميه
حقچ يزهره الضاع هاي اوّل رزيه – من نكرو الاشرار ورچ يالزچيه
كل حق الِچ نكروه – حق الورث حرفوه
الطه النبي خانوه – خلّو گلبچ مهضوم
مظلومه يا زهراء مظلومه
..............
خاب الذي عاداچ يا بضعة نبينه – بْمجلس عزانه وْدوم للظالم ندينه
اجيال بعد اجيال يومچ ما نسينه – ننعه وْنِنوح عْليچ يالزهره الحزينه
للموت ما ننساچ – ارواح هاي افداچ
رب العرش علّاچ – نورچ بالكون يْحوم
مظلومه يا زهراء مظلومه
..............
الانذال ما يردون لمصابچ نذكره – دايم يظل ذكراچ طاغيهم نحذره
واللي اعتده اعله الدار سيدهم نشهره – نهج وْمشينه اعليه والله وْما نِغَيره
شيطان مو انسان – كلمن جافاچ وْخان
وانفضحه بالاوطان – راعي العهد المشؤوم
مظلومه يا زهراء مظلومه
..............
مظلومه نبقه نْصيح للحاقد نِسَمعه – ناعيچ يبقه يْنوح نتحدّه اليمنعه
وْلجلچ علَم للثار كل شيعي يِرفعه – وْثار ابنچ المذبوح لجله الكون ينعه
رايات صار سْنين – نرفعها منتظرين
لابنچ ينور العين – ياخذ ثار المظلوم
مظلومه يا زهراء مظلومه
..............
لابد يجي الموعود للحق وْيردّه – يْزيح الظلم والجور عهد الخير عهده
بْثارچ يِنادي وْثار دمّ حسين جدّه – سبط الوصي الكرار يا ويليه اليصدّه
يفنيها للاشرار – والعادو الاطهار
ما تنفع الاعذار – كل باطل لا ميدوم
مظلومه يا زهراء مظلومه
.................................
.................................
خادم اهل البيت ( عليهم السلام )
الشاعر الحسيني
سعيد الفتلاوي الطويرجاوي
.................................
خادم اهل البيت ( عليهم السلام )
الشاعر الحسيني
سعيد الفتلاوي الطويرجاوي
حسين منجل العكيلي
تعليق