تويت
ننخـــاك يا گمر هاشم بحــــماك يا گمر هاشم
نار العــــطش بالروح بــــا صرنه وين نروح
ننخاك يا گمر هاشم
* * *
عباس آنه اختك واجيت اشكي الحـال يــــــــا با الفضل بحماك للطف جيـنه
بهاي الخيم عندك فواطم وأطــــــــفال كلها تصيح العطش أثـــــر بيــــــــنه
وهذا الفرات اليجري مثل السلـــــسال ليش انمنع ها لماي بــــــــس اعلينه
عبد الله شاطت مهجـــته والــــــــدلال وشچم طفل عالجود شابح عــــــــينه
اطفال يا گمـــر هاشم وعـــــيال يا گمر هاشم
تنادي ابگلب مجروح بــــا صرنه وين نروح
ننخاك يا گمر هاشم
* * *
يا با الفضل بالگلب تسعـر نــــــــيران والعطش تدري اشخلفــت آثــــــــاره
هاي الرباب اتحوم وسط الصــــــيوان جف الحليب وبا لطفــــل محــــــتاره
دمعتها تجري أعله الرضيع العطشان والگلب ذبلت بالحـــــزن أثمــــــــاره
متگلي شيصبر گلــوب الرضعــــــــان وهذا العطش شيطفي جمــــــرة ناره
هالجود يا گمر هاشـم موجــــود يا گمر هاشم
ليك النظر مشــــــبوح باصـــــرنه وين نروح
ننخاك يا گمر هاشم
* * *
عباس اشرحلك مصابـــي وهــــــــمي يا خويه ساعدني اعله همي وبلواي
بالخيم كلسا طفله توگــــــــف يــــــمي التفت لنها تصرخ المــــــــاي الماي
تنشدني عنك ليش ساكـــت عــــــــمي ما يدري تسعر بالگلب نار اظمــــاي
يا ريت دمعي ينفرز عــــــــن دمـــــي چان اسگي هالطفله بمدامع عــيناي
جرحين يا گمر هاشـم بالعـــــين يا گمر هاشم
دم ودمع مسفـــــــوح باصــــــرنه وين نروح
ننخاك يا گمر هاشم
* * *
هذا انته يا عــــباس شخصــك موجود وهاي آنه جيتك يا گمر شچايــــــــه
هاك اخذ جودك هاك يا راعـــي الجود يابا الفضل اگصـــــــد للمسنايــــــــه
عندك عهد والعهد أصبح مــــــــريــود يا لگلت هاي العــــــــايله بحــــمايه
لتگول ملزوم الفرات ومـــرصــــــــود شنهو الفرات اخذ الفرات ومــــــايه
معروف يا گمر هاشم موصوف يا گمر هاشم
سهم المصيبه يلـــوح بــــا صرنه وين نروح
ننخاك يا گمر هاشم
* * *
من گبل ما للنهر تمضــــــــي وتطــلع عــــــــندي وصيه آوياك أرد احچيها
هالگوم لو هجمت يعــباس ارجــــــــع مــــــــا ردنه روحـــك للأجل تنطيها
لو چان گصدك تعتــــــــني للمصـــرع متريد ماي الحرم يــــــــا والـــــــيها
خليني اسگيها بمســـــيل المدمــــــــع بس ترد سالم دمعـــــتي تكفيــــــــها
ردناك يا گمر هاشـــم ويـــــــاك يا گمر هاشم
لو گالولي مذبـــــــوح بــــا صرنه وين نروح
ننخاك يا گمر هاشم
* * *
يا خويه تتراوالي اشــــباح البــــــــين وصوت المصايب بالحــزن أوحــالي
چني أشوف بعيني گطـــــــــــع الچفين والعمد يفضــــــخ هامــتك يالـــوالي
خليك يمنه ولا تـــــروح بــــــــهالحين والماي شنهو ولجــــله تنطي الغالي
كل سهم لو صوبك يصـــــــبح سهمين لو سهم لاحـك لا حــني ابدلالــــــــي
آهات يا گمر هاشم عــــــــبرات يا گمر هاشم
بس الصبر مسموح بــــا صـــرنه وين نروح
ننخاك يا گمر هاشم
* * *
الشاعر الأديب الحاج جابر الكاظمي
الشاعر الأديب الحاج جابر الكاظمي
تعليق