تويت
ياصبح ارحم حالي / ابطلعتك تنهي امالي
خلي الضلام امغطيك / ابدمعتي اتوسل بيك
ياصبح ارحم حالي
ياصبح هم عدك خبر/ ابطلعتك يهضمني القدر/ واتجرع هموم ومصايب
بس تكشف ابنورك علي / راح اوكع واصفك بدي /راح افكد اهلي والحبايب
حاول تعطل هالامر / ولتطلع اخيوط الفجر / ابطلعتك اتحمل نوايب
لوتعرف اباصلي امنين /جان اهملته العينين
زينب انه الي اتحاجيك / ابدمعتي اتوسل بيك
ياصبح ارحم حالي
امهلني جم ساعه / بعد خليني اودع البالمهد/ وخليني الوليله ابجمرتي
وارد افتح اكماطه واصد / لمه واكلهه تستعد / وحتى تواسيني ابدمعتي
وخليهه من هسه توون / واعله الطفل تدمي الجفن / ابشوفته مردلي جبدتي
وباجر تشوفه مذبوح / ويرضع ابدمه المسفوح
واتكله يوليدي اشبيك / ابدمعتي اتوسل بيك
ياصبح ارحم حالي
كبله اكصدت شبه النبي/ الاكبر ابوجهه البهي/ واكعدت يمه وكمت اواسيه
عالموت اسولف واساله / يجاوبني اطهر منزله/ ياعمه ماانطر الاكيه
وجاسم ابصفه يستمع / مثل الحسن هذا السبع / ويكلي ياميت هله بيه
وشبكوني همه الاثنين / ابن الحسن وابن حسين
ياصبح ارحم حالي
ياصبح لوشفت الكمر/ يم ابو اليمه من حضر / كلي يزينب اسمعيني
ياخويه اخافن ماارد / وينكطع نحري و الزند / خويه اريدج تعذريني
ولوبقه جسمي عالنهر/ متكطع وصاير وذر / بالعتب لا لا تلجميني
مااكدر احمل العتاب / لوبيه مليون اصوب
كتله يخويه ادريك / بدمعتي اتوسل بيك
ياصبح ارحم حالي
ياصبح واخر طلبتي/ خليني اودع مهجتي / معميه عيني من نضرته
يفتر عله كل الخيم / ايودعهم وكله الم / ياويلي حابسهه الدمعته
ويكلي يختي اكفلي / من بعدي ولضعن النبي/ وشابكني مستعره جمرته
وكلي لون يسبونج / ضمي الدمع بعيونج
وماادري بيش اواسيك / ابدمعتي اتوسل بيك
ياصبح ارحم حالي
ياصبح ارحم حالي
ياصبح هاذي قصتي/ بطلعتك تبده غربتي / واتكفل انه باليتامه
وباجر عليه هالخيم / تشعلهه عباد الصنم / وبمتني راح اخذ علامه
وراح اجمع اطفال وحرم / من بعد اهلي اهل الشيم / وراح اسهر الليل وضلامه
وراح امشي بين الوديان / وتنضر عليه العربان
واحزاني راح اتحاجيك / ابدمعتي اتوسل بيك