دخيلك ياعلي

[خالد محمد مهدي الحجار]

(( دخيلك ياعلي ))

***********

دخيلك ياعلي غيمه بسواد الليل

مثل رد الشمس عن هل الوطن ردهه

دخيلك ياعلي من رمح وحشي الئيوم

جبده الحمزه صابه وهند يسعدهه

دخيلك ياعلي ألتمت علينه أحزاب

كَص راسه العمر وأحزابه شرّدهه

دخيلك ياعلي من شيلت القرآن

يرد صفَّين جفَّك عنَّه يبعدهه

دخيلك ياعلي من ناس ماترحم

من بدر وأحد أبليس جنّدهه

دخيلك ياعلي من حفصه من عيشه

معركة الجمل داعش تجسّدهه

دخيلك ياعلي من مرحب وجيشه

صفَّي كَلوبنه وبوجهه وحّدهه

دخيلك ياعلي يمهوِّن الشدّات

أبن ملجم كَصدنه بنار خمّدهه

دخيلك ياعلي للرايه يردوهه

ونار الجور تحرك بينه برّدهه

دخيلك ياعلي بردا سلآم وياك

وأذا يرمي الموالي الرميه سددهه

دخيلك ياعلي أحضر ميادينه

هذا أبن العراق سيوفه جرّدهه

دخيلك ياعلي وفقّارك ويانه

وهيهات الحسين الكل نرددهه

دخيلك ياعلي والكَاصدك ماخاب

الشيعه للمعاضل غيرك أشعدهه

دخيلك ياعلي لنطيح بالغربال

سفينة ابو اليمه شلون نصعدهه

دخيلك ياعلي مروتك على بختك

يقينا بأعتقاد الباب متسدهه

دخيلك ياعلي بكل خطوه ويّانه

يا للثار كلمه الحر يرددهه

دخيلك ياعلي وعله العهد باقين

يوميه وثيقة دم نجددهه

دخيلك ياعلي أبهل الزفَّه أحضرنه

مواكب للشاهاده وأنته شاهدهه

[احمد جبر حمود]

شكرا لك أخي الكريم

[خالد محمد مهدي الحجار]

ممنون لمروركم وفيضكم
مع الود من القلب
شكرا // ممنون

[بيرق]

سلمت اناملك يا شاعرنا المبدع خالد محمد مهدي الحجار قصيدة كلماتها جميلة
ان شاء الله تزاح هذه الغيمة عن عراقنا الحبيب وتعود شمسه ساطعه على كافة ربوعه

[خالد محمد مهدي الحجار]

آن شاء الله ينصرنا على داعش وحواضن داعش

ممنون لمروركم وفيضكم
مع الود من القلب
شكرا // ممنون

[خليل علي الزبيدي]

وفقكم الباري يا خالد بحق فاطمة الزهراء عليها السلام