تويت
بچيت شگد على فراگك يبو اليمه
ترد روحي بضريحك لون أشتمه
هيچ زيارتك صارت حلم ياحيف
ما معقوله وانت الي تعزب الضيف
بگيت اتمنى أزورك حتى لو بالطيف
وگبل چانت بصحنك كلها ملتمه
يحسين الوبآء تگابل علينه
فرگنه اوولانه ولا رحم بينه
واحنه المانعوفك وانت تدرينه
كل واحد إلك فدوه نذر دمه
يبو السجاد ما أتحمل آني جفاك
أسولف بيك كل لحظه ولا أنساك
ولا بطَل دمع عيني بسبب فرگاك
وكل ايامي سوده من الحزن ظلمه
رغم كل البعد والضيم مامليت
أزورك وشكثر يحسين أنه ناديت
مكسور الگلب واعتابي الك وديت
وآنه سنين اگصدك وامشي بهمه
لو بيدي احضرتلك زحف يامولاي
واخاطر مو مهم واوصل إلك عناي
أجيلك بالمدامع جية الشچاي
وبصحنك أصيحن هااا يبو اليمه
نخيتك طالت وماظل صبر عندي
اوضعي بلا زياره حيل متردي
يباب الله الشدايد بلچن اتعدي
والمشتاگ اريدن ينكشف همه
--------------------
سميرالصالحي- النجف الأشرف
5ذي القعدة1441هـ
السبت27-6-2020م
تعليق