السلام على مولاتي ام البنين وعلى اولادها

[الشاعر هاني]

ربيتينه ربيتينه -- اولادچ احنه -- تعرفينه ربيتينه
***
من عزة حيدر عزتنه ومن ترباتچ
رضعتينه زود وغيره وجوهر ذاتچ
بذرة جود ازرعتي بدمنه بكل طيباتچ
وضليتي سنين تساگيها من دمعاتچ
وتاملتي وتاملتي ثمرات ألبذره تشوفيها
ربيتينه ربيتينه اولادچ احنه تعرفينه ربيتينه
***
يولادي أدريكم هيبه انتو ورفعت راسي
وانتو الشريان اليرويني وانتو أنفاسي
كل واحد انظر لسنينه بعين إحساسي
غالين وبيكم اتنومس يانوماسي
حسين الغالي حسين الغالي هذ ابن الزهره المظلومه
ربيتينه ربيتينه اولادچ احنه تعرفينه ربيتينه
***
اولادج زين تعرفينه بينه اكفايه
نحمي حسين ونمشي بأمره نشيل الرايه
نقسم بالقرءان المنزل وبكل إيه
سيف نصير بچف حسين ونحمي الرايه
لا منعوفه لا منعوفه لحسين نقدم كل غالي
ربيتينه ربيتينه اولادچ احنه تعرفينه ربيتينه
***
يا جعفر ياعون عيوني الكم تربي
ياعبد الله رسمك أصبح شمعه دربي
صاحت ياعباس وياكم رايح گلبي
وبگيت إني بدمعي الجاري اسأل ربي
يحقق حلمي يحقق حلمي تنصرون حسين ابن ألزهره
ربيتينه ربيتينه اولادچ احنه تعرفينه ربيتينه
***
صاحوا يوم العاشر صيحه تدمي الناضر
ريتچ يحبيبه تشوفين بينه اشصاير
ثمرة ترباتچ ما ضاعت لا والقاهر
بالطف كل احنه أرويناها بدمنه الطاهر
لو بيدينه لو بيدينه نرجعلچ بحسين وضعنه
ربيتينه ربيتينه اولادچ احنه تعرفينه ربيتينه
***
من سمعت ناعيهم ينعه صاحت يبني
يادمعة عيني وياسلوت نوحي وحزني
بفراگك ما تدري اشلون أصبح ضني
ترجعلي سالم يحسين وتفرحني
فدوه بنيني فدوه بنيني الدم نحرك ياروح الروح
ربيتينه ربيتينه اولادچ احنه تعرفينه ربيتينه
***
بقلمي
10 / شهر صفر / 1441
الشاعر هاني حماده البلداوي