قصيدة استشهاد الأمام الحسن عليه السلام بوزن ( التجليبة )
ياوارث محمد ياشــبل حيــــدر
لـَنوحك مايظل العمر ياشُبَّر
****
يمـَن غرَّﮒ الوادم بالنـــــعم چفه
إنسها وجانها لشبل النبي تعرفه
هظيمة اليوم اميه بموته تتـــشفـَّه
ريحانة محمد مالـــــك الكـــــــوثر
****
خط لوح الكرم والغانـــــــمه بيده
وعلوم الرساله لجابـــــــــها جده
تلوذ الوادم بيـــــوم اللظى بسده
وليـﮔصد لبابه بطـــــلب مايخسر
****
حمل راية الهادي وسيف داحي الباب
وجاهد بالعراق المــــارقة الأذنــــــاب
وﮔلبه من الخيانة ﮔبل سِمها نصــاب
على همومه الصخر لوســـمع يتفطـَّر
****
علَ عتاب الحسن هاليوم ناح الروح
ﭼن هاليوم بمصاب الرسول ينوح
ﭼن فوﮒ المصلى المرتضى مطروح
ﭼن جبـــريل ساعة فاطمة كـــــــــبَّر
****
ومن عظم المصايب جور عدوانه
سلَّت سيفها ومنعت الدفانــــــــــه
وجتـِّي عل البغل لوهــُمه لو آنــــه
تـُسع الثـُمن حـﮔـها وبيها تتــــــأمر
****
تصيح بصوت ماريد الحسن يمي
يزيد بدفنتي يَم النبـــــــــــي همي
صح المثل بين النــــــاس ياعمي
الظرف يهل العقل باللي حـِوَه ﮔطـَّر
****
يلرايد كرامة ويرتفع شـــانك
قوِّي بحب كريم الدار إيمانك
خادم للحسن وحسين عنوانك
بجنات النعيم هناك تتــــــبشَّر
****
تتبشر وتلـﮔـه امَّه الزجيَّه هناك
وطيور السعد والحور تتلـﮔاك
تـﮔلك ياموالي اليوم ﮔر عيناك
آمن بالقيامة وساعة المحشر
****
٦ صفر١٤٣٤هجرية
خليل علي الزبيدي
تعليق