لا تشيلون الروس يهل الحمـــيَّه ( لطمية يوم عاشوراء )

[خليل علي الزبيدي]

لا تشيلون الروس يهل الحمـــيَّه
حسين فوﮒ التربان بالغاضريه
ــــــ
لاتشيلون الروس يهل الريــــاسه
عدكم حسين اليوم عالرمح راسه
اليوم فوك التربان روح القداسه
نذبج سبط المختار بيد آل اميه
ــــــ
وينها ليوث الدين وين الهواشم
عدكم حسين اليوم عالكاع نايم
وين طه المختار وين ابو القاسم
اليوم فوك التربان شبل الزجيه
ــــــ
ليش زينب هاليوم محد حماها
والكفر بعد حسين هد وسباها
وين فهر وعدنان عمروعلاها
ماتشيل المظلوم من الوطيَّه
ــــــ
نطفه بذبح المظلوم نور الهدايه
والحرم والأطفال راحت سبايه
وعالنهر طاح اليوم حامل الرايه
وناحت على أخت حسين كل البريِّه
ــــــ
شيبة حسين اليوم بالدم خضيبه
تشتكي فوك الكاع لله وحبيبه
تسحك بصدره الخيل ياللمصيبه
بت علي هذا اليوم طلعت سبيه
ــــــ
يالثارات حسين صاحت سماها
والملك وي الجان عجَّت وياها
وناح عرش الرحمن من نوح طه
وحورها بذاك اليوم نصبت عزيه
ــــــ

خليل علي الزبيدي
10 محرم 1441هـ