تويت
اللهم صل على محمد وال محمد الطيبين الطاهرين
اليكم ابيات في حق مصيبة الحسين ع ارجو ان نوفق بها والتوفيق لقارئيها
ياجرح الطفوف الما يلمه اضماد =ويا نحر اليلمه أضماد ونضمده
امن الابهر يسيل ونزفه حار وحاد= وبجرف الاباء اتنومس وندّه
صعد ضوّة الزوايا الاظلمت بالكون= طش نوره وصفت عين الشمس رمده
بسيوف المناية ايذوب حد كل سيف =والشاطر يهج ويلبد بغمده
بس هذا الجرح شايل معاني السيف= يضحك عالمنية وضحكته بحده
مد روحه نهر كل ضفه معنى اتشيل= وحده ام الفرج والثانية الشده
يتفايض كرامة وعزة ماتنظام= وعيون الحياة اتروت بمدّه
ماشايف جرح يضحك بوجه السيف= وانطاه بكرم من طلب ما رده
شال اطباع راعيه ابيّ الظيم= ماهزه الوﮔف سبعين الف ضده
من مثلة ايتبرهج منه ﮔلب أعداه= يخطيله الجدم ذباحه ويرده
صاحتلة الرماح وصاح بيهه حسين= اﮔبل واﮔبلت واتصوره ابوحده
مد روحه وفه ومد جفه غطه الكون= خيّم عالطفوف بعزم يتحده
يافيّ اليتامه وياروي العطشان= ياسور العداله النحتمي بسده
ياكوسر هوانه العلّم المايوس= يتوزر شهامة وغيرتة بحده
يالعزمك رمح شل كل رماح اعداك= وأتعـﮔر الخيل المالهن عده
من مثلك ترس حلـﮓ المنية ابطال= كرم حتى برضيعه النايم بزنده
من مثلك وﮔف والموت صف اوياه= شتل روحه درع لاينسحـﮓ حده
فزعت من وﮔف نبض الزلم يحسين= صدرك ناحر السيل وصرت سده
تتسابـﮓ نصد العاديات اعليك= جم سيف انفرك بظلوعك وحدّه
شحالك من عطش جبدك يبو الاحرار= وطفك شدة ظلت تتبع الشده
تلطّخ بالمذله وشّيب التاريخ = من شال النذل راسك ضرب خده
تعليق