(( صوره بخيالي ))
صوره بخيالي مرسومه لجمالك ... وگضي الليالي اتنظّر وصالك
ياخذني ليك الحنين ... انته حياتي حُسين
صوره بخيالي مرسومه لجمالك
************
ياأمير الشــــوگ يامن تسري ويه انفاسي
والله من يوم العرفتك صرت رفعة راسي
طبعي أنه من الولاده أعشـــگ إِبحساسي
تدري ياريع العُمر ... يحله ويّاك الصبُر
مايهمني شما مايمُر
دوم إِعله بالي ياتاج الكرامه ... ثابت وصالي مايخشه الندامه
عزمي أبد مايلين ... أنته حياتي حُسين
صوره بخيالي مرسومه لجمالك
************
يانهر يجري بحيــاتي شلون ارد معروفك
صار كل همي أگضّي العُمر يم اجـروفك
وانه بســــــــواد النواظر دوّنيت أحروفك
بلسم أنته الكل جرح ... اوكلبي بسمك منشرح
مثلك أبداً يصح
ساكن ضميري يمنور فؤادي ... اگضي حياتي سهران اوانادي
رغماً عله الحاقدين ... انته حياتي حُسين
صوره بخيالي مرسومه لجمالك
************
روحي مشتاگه تشـــــوفك وانته تعلم بيها
ماتهوّد لـون لحظـه ماتمُـر إِعليهـــــــــــا
تصفه بغيـــــــابك غريبه اومحّد ايواسيها
تظل مشدوهت فكر ... اوتحچي وي خيط الفجر
تگلّه مامرني البدر
غاب اوتركني اتحمل اذيه ... چايمته يرجع وتبارك إِبضيه
خل تسمع العاشگين ... انته حياتي حُسين
صوره بخيالي مرسومه لجمالك
************
انه ماأگدر اعوفك صرت ســـــــــلوة روحي
اولورحت عني عيني لحظــه ما ابطل نوحي
تدري من بعدك احير شلون اداوي اجروحي
أبقه گاعد عالدرب ... والدمع مني يصب
وشكي همي للغُرب
مرمرني كلبي مايهجع ونينه ... يسئلني يمته محبوبي يجينه
يصرخ ابجرح السنين ... انته حياتي حُسين
صوره بخيالي مرسومه لجمالك
************
كلبي ولهـــان ابودادك هاك اخـــــــــذ أخباره
عُگبــك أحــــــواله عجيبه اودمع عينه تجاره
ونطُفت بعدك يغـــــــــــالي اليـــله كل انواره
من سمع عنّك خبر ... چم ضلع بيك انكسر
اوطاح إِخيـّك عالنهر
ناده الظليمه شرع الله تصوّب ... وبدم وريده هلليله تخضّب
انحب عليك ابونين ... انته حياتي حُسين
صوره بخيالي مرسومه لجمالك
************
بقلم / سعد مطلوب الخفاجي
******
رابط القصيده
https://www.youtube.com/watch?v=OLrD4JnN0ds
تعليق